Fara í efni
Ingólfur Geir Gissurarson, Skagamaður, fasteignasali og Everestfari flytur erindi um ferð sína á Mount Everest 21. maí 2013.

Að morgni 21. maí árið 2013, kl. 6:15  að staðartíma  (0:30 að íslenskum tíma) náði Ingólfur Geir tindinum í 8.848 metra hæð og var þá elsti Íslendingurinn, sem það hafði gert og jafnframt fyrsti afinn.   Hann er fæddur á Suðureyri við Súgandafjörð 1962 og ólst upp á Akranesi frá fjögurra ára aldri. Hann er menntaður íþróttakennari og löggiltur fasteignasali og hefur unnið við fasteignasöluna Valhöll í Reykjavík.

Átta ára hóf Ingólfur að stunda sund af krafti á Akranesi og komst í allra fremstu röð, varð margfaldur Íslandsmeistari á árunum kringum 1980, setti alls 20 Íslandsmet og var valinn sundmaður ársins á Íslandi 1981. Á 10. áratug síðustu aldar fór Ingólfur að stunda langhlaup af krafti og hefur lokið alls 24 maraþonhlaupum og 5 sinnum orðið Íslandsmeistari í maraþonhlaupi.  

Alla tíð hafa þó fjallgöngur heillað Ingólf og hann stundað þær ótrauður. Árið 2007  kleif hann Elbrus í Rúslandi sem er hæsta fjall Evrópu, 5.650 metrar.  Árið 2009 og 2011 gekk hann á fjallið Aconcague   í Argentínu, sem er hæsta fjall Suður-Ameríku, 6.960 metrar. Það fjall er oft nefnt Everest áhugamannsins og er hæsta fjall heims fyrir utan Himalayja fjallgarðinn.  Árið 2016 gekk Ingólfur á Kilimanjaro sem er hæsta fjall Afríku.

 Ingólfur er Skagamönnum að góðu kunnur, sonur Jónínu Ingólfsdóttur ljósmóður og fóstursonur Ásmundar Ólafssonar. Hann er giftur Margréti Björk Svavarsdóttur og eiga þau þrjár dætur og þrjú barnabörn.

Fyrirlestur Ingólfs er samvinnuverkefni Snorrastofu, Brúaráss í Hálsasveit og Sögu jarðvangs. Efni hans fellur vel að þeim útivistaráhuga, sem nú er áberandi víða að ekki sé talað um markþjálfun, sem hlýtur að vera órjúfanlegur hluti þess að ná þeim árangri, sem hér um ræðir. Umræður og kaffiveitingar eru að venju hluti af kvöldinu og aðgangseyrir er eitt þúsund krónur.