Fara í efni

Gagnlegar upplýsingar fyrir nýja íbúa

Fjölskylduskemmtun

Borgarbyggð leggur áherslu á fjölskylduvænt samfélag þar sem menntunarframboð og aðstaða til íþrótta- og tómstundaiðkunar er til fyrirmyndar.

Skólar

Í Borgarbyggð eru starfandi fimm leikskólar, tveir í Borgarnesi, einn á Bifröst, einn á Hvanneyri og einn á Kleppjárnsreykjum, en þar hófst bygging nýs og glæsilegs leikskóla árið 2019.

          Leikskólar í Borgarbyggð

Tveir starfandi grunnskólar eru í sveitarfélaginu á fjórum stöðum, Grunnskólinn í Borgarnesi og Grunnskóli Borgarfjarðar sem er starfræktur á Hvanneyri, Kleppjárnsreykjum og Varmalandi. Um þessar mundir standa yfir framkvæmdir í Grunnskólanum í Borgarnesi, en unnið er að stækkun og miklum endurbótum á húsnæðinu. Grunnskólinn í Borgarnesi er einkar vel staðsettur, en íþróttasvæðið, sundlaugin og tónlistarskólinn eru í einungis 100-200 m fjarlægð.

          Grunnskólar í Borgarbyggð

Borgarbyggð státar af fyrirtaks menntaskóla (MB) sem stofnaður var árið 2006 í Borgarnesi. Skólinn fer ótroðnar slóðir í starfsháttum og námsframboð er fjölbreytt. Í boði er félagsfræðibraut, íþróttafræðibraut, náttúrufræðibraut, opin braut, framhaldsskólabraut og starfsbraut. Nýlega bættist við braut sem nefnist náttúrufræðibraut – búfræðisvið sem er samstarf á milli MB og Landbúnaðarháskóla Íslands á Hvanneyri.

          Menntaskóli Borgarfjarðar

Tveir háskólar eru starfræktir í sveitarfélaginu, Háskólinn á Bifröst og Landbúnaðarháskóli Íslands á Hvanneyri. Fá sveitarfélög bjóða upp á jafn fjölbreyttar námsleiðir á háskólastigi.

          Háskólinn á Bifröst

          Landbúnaðarháskóli Íslands

Öflugur tónlistarskóli hefur verið rekinn í Borgarnesi frá árinu 1967. Tekið er við nemendum á öllum aldri og kennt er á öll helstu hljóðfæri auk söngs.

          Skólanámskrá Tónlistarskóla Borgarfjarðar 

Símenntunarmiðstöðin á Vesturlandi starfar í Borgarnesi. Símenntunarmiðstöðin stendur fyrir ýmsu námsframboði í fullorðinsfræðslu, auk náms- og starfsráðgjafar o.fl. Símenntunarmiðstöð þjónustar einnig fjarnema í háskólanámi, en þeir geta tekið próf í heimabyggð.

          Símenntunarmiðstöðin á Vesturlandi

 Húsnæði

Lausar eru íbúðarlóðir til úthlutunar, bæði í Borgarnesi, á Hvanneyri, Varmalandi og í Bæjarsveit. Á árinu 2019 hefur sveitarstjórn ákveðið að bjóða sérstök kjör á byggingarlóðum; niðurfellingu lóðargjalda og 50% afslátt af gatnagerðargjöldum.

          Lausar lóðir

Fasteignir á söluskrá má skoða á fasteignasíðum Morgunblaðsins og Vísis. Jafnframt eru starfandi fasteignasölur í Borgarnesi.

Íþróttir og tómstundir 

Frístundaheimili eru starfrækt við báða grunnskóla Borgarbyggðar (Frístund í Borgarnesi, Selið á Hvanneyri). Þar er 6-9 ára börnum boðið upp á fjölbreytt tómstundastarf eftir að skóladegi lýkur. Í félagsmiðstöðinni Óðali er boðið upp á uppbyggilegt félagsstarf fyrir 10-16 ára börn og unglinga í frítímanum. Borgarbyggð styrkir frístundaiðkun barna og ungmenna á aldrinum 6-18 ára með framlagi að upphæð kr. 20.000 á ári.

Íþróttamannvirki og sundlaugar eru á þremur stöðum; í Borgarnesi, á Kleppjárnsreykjum og Varmalandi. Sparkvellir hafa verið settir upp á skólalóðum í Borgarnesi, á Hvanneyri og á Bifröst. Fjölbreyttar hjóla- og gönguleiðir má finna í Borgarbyggð og unnið er að frekari uppbyggingu göngustíga m.a. í Borgarnesi. Víða eru góð leiksvæði fyrir börn og sífellt verið að bæta við. Þar má nefna að nýlega var settur upp ærslabelgur á íþróttasvæðinu í Borgarnesi. Ekki má gleyma Einkunnum, skógræktarsvæðinu rétt fyrir ofan Borgarnes, sem er kjörið til útivistar og samveru.

Í Borgarbyggð eru frábærir golfvellir með öflugu ungmennastarfi.  Fyrir hestafólk er að finna góða aðstöðu til hestamennsku í nánd við þéttbýliskjarnana. Stangveiði er mikið stunduð í sveitarfélaginu yfir sumarmánuðina, jafnt af íbúum sem gestum. Áhugi íbúa sjósporti, svo sem á sjósundi og kajakróðri, fer vaxandi og áhugamannafélög hafa verið stofnuð.

          Íþróttir og tómstundir

          Ungmennasamband Borgarborgarfjarðar

Menningarlíf

Menningarlíf í Borgarbyggð er með eindæmum blómlegt. Ýmis konar klúbbar, samtök og áhugamannafélög eru með virka starfsemi og standa fyrir reglulegum viðburðum. Kórastarf í sveitarfélaginu er öflugt og það sama má segja um leikfélögin.  Árið um kring er hægt er að sækja sér nýja þekkingu á námskeiðum og fyrirlestrum af ýmsum toga í Borgarbyggð. 

Safnahúsi Borgarfjarðar er staðsett í Borgarnesi. Þar er boðið upp á ýmsa viðburði árið um kring og þar er Héraðsbókasafn Borgarfjarðar til húsa auk skjalasafns og munasafna. Á bókasafninu er fjölbreytt úrval bóka og annars afþreyingarefnis auk aðgangs að tölvu, lesaðstöðu og aðstöðu fyrir börn. Í húsinu eru einnig tvær grunnsýningar, Börn í 100 ár og Ævintýri fuglanna og tímabundnar sýningar á sviði byggðasögu auk listsýninga. Sjá má nánar um þjónustu hússins á heimasíðu Safnahúss, www.safnahus.is.

Landbúnaðarsafn Íslands er staðsett á Hvanneyri og er byggt á grunni Búvélasafnsins sem starfað hafði á Hvanneyri um langt árabil. Þann 2. október 2014 var grunnsýning safnsins opnuð þar og einnig tekið í notkun nokkuð geymslurými þar í húsinu, auk fjölnotasalar í sk. Suðurhlöðu. Síðustu 16 árin hefur safnið verið opið um ársins hring, og er á móti gestum tekið eftir þörfum og pöntun. Sumarmánuðina júní-ágúst hefur safnið verið opið daglega. Gestafjöldi á hverju ári hefur verið um fimm þúsund manns. Sjá nánar um þjónustu hússins á heimasíðu safnsins, www.landbunadarsafn.is

Verslun og þjónusta

Við Borgarbraut í Borgarnesi er verslunarkjarninn Hyrnutorg. Þar er Nettó-verslun, Lyfja, Vínbúðin, íþróttavöruverslun, gjafavöruverslanir, hárgreiðslustofa og fleira.

Bónusverslun er að finna í útjaðri Borgarness, við Borgarfjarðarbrúna. Í sama húsi er Geirabakarí. Byggingarvöruverslanir er jafnframt að finna í bænum.

Úrval veitingastaða í Borgarbyggð er gott og hefur aukist mikið á undanförnum árum.

Olís, N1, Orkan og Atlantsolía reka þjónustu á nokkrum stöðum í sveitarfélaginu.

Heilbrigðisþjónusta

Heilbrigðisstofnun Vesturlands rekur heilsugæslustöð á Borgarbraut 65, 310 Borgarnes.

          HVE / Heilsugæslan í Borgarnesi

Hagnýtar upplýsingar

Innritun í leikskóla, frístundastarf o.fl. fer fram á þjónustugátt Borgarbyggðar.

          Umsóknareyðublöð (þjónustugátt Borgarbyggðar)

Flutningstilkynningar eru afgreiddar af Þjóðskrá Íslands.

          Tilkynna flutning

RARIK ohf. sér um rafveitu í Borgarbyggð.

Veitur ohf. sjá um hitaveitu í Borgarbyggð.

Arion banki rekur útibú í Borgarnesi.