Fara í efni

Mikið um byggingarframkvæmdir

Mikið um byggingarframkvæmdir

Um þessar mundir sjást vinnuvélar og iðnaðarmenn að störfum vítt og breitt um Borgarbyggð. Líkt og undanfarin ár er mikið um byggingarframkvæmdir í sveitarfélaginu. Nokkur stór verkefni eru nú mjög langt komin, en þar má t.d. nefna stækkun og endurbætur á Grunnskólanum í Borgarnesi, fjölbýlishús-þjónustuhús-hótel við Borgarbraut 57-59, verslunarhúsnæði við Digranesgötu 4 og nýja hótelið í Húsmæðraskólanum á Varmalandi.

Ekkert lát virðist ætla að verða á framkvæmdagleði í sveitarfélaginu. Það sem af er ári, nú í byrjun júní, hefur byggingarfulltrúi tekið við um 60 nýjum umsóknum og tilkynningum um byggingaframkvæmdir. Allar umsóknir berast nú á rafrænan hátt í gegnum íbúa-/þjónustugátt Borgarbyggðar. Á síðasta ári voru umsóknir í kringum 100 talsins og það sama gildir um árið 2017. Allt útlit er fyrir að umsóknir um byggingarframkvæmdir verði fleiri í ár en árin á undan.

Öllum byggingarframkvæmdum fylgir talsverð umsýsla í samræmi við lög og reglugerðir. Sem dæmi mætti nefna að frá síðustu áramótum hefur byggingarfulltrúi skannað í kringum 800 teikningar inn á Kortasjá/teikningavef Borgarbyggðar - og sífellt er að bætast við. Við minnum á að hægt er að nálgast allar stimplaðar teikningar, ásamt skipulagsgögnum á Kortasjá/teikningavef Borgarbyggðar; http://borgarbyggd.is/kortasja/kortasja.html 

Sjá nánari leiðbeiningar um notkun Kortasjár/teikningavefs í fyrri umfjöllun: https://www.borgarbyggd.is/frettir-slideshow/kortasja-loftmynda-teikningavefur-borgarbyggdar/

Fréttaskot Umhverfis-og skipulagssviðs nr. 18