Mánudaginn 31. október 2006 kom landbúnaðarnefnd saman til fundar kl. 13.30 að Borgarbraut 14 í Borgarnesi.

Mætt: Kristján Magnússon, Sigurður Helgason, Sigrún Ólafsdóttir, Guðrún Fjeldsted og Sveinbjörn Eyjólfsson. Auk þeirra sátu fundinn dreifbýlisfulltrúar Sigurjón Jóhannesson og Þórvör Embla Guðmundsdóttir sem ritaði fundargerð.

Bréf frá eigendum jarða í Þverárhlíð

Lagt fram bréf frá eigendum jarða í Þverárhlíð vegna smölunar heimalanda. Þar sem bréfið barst ekki nefndarmönnum fyrr en á fundinum þótti mönnum erfitt að meta stöðuna með svo stuttum fyrirvara. Ákveðið að fresta afgreiðslu til næsta fundar en aukafundur verður í nefndinni í næstu viku.

Þá kom fram að bréf sveitarstjóra vegna smölunar heimalanda, sem sent var út í haust hafði ekki verið sent út Borgarfjarðarsýslumegin í sveitarfélaginu.

Flutningur á fé milli svæða

Lagt fram bréf frá Dagbjarti Dagbjartssyni og Þórdísi Sigurbjörnsdóttur  þar sem þau óska álits nefndarinnar á því að fé verði flutt frá Refstöðum í Hálsasveit að Hrísum í Flókadal. Fyrir liggur samþykki Sigurðar Sigurðarsonar dýralæknis. Nefndin gerir ekki athugasemdir við flutning þennan.

Nefndarmenn ræddu nokkuð um hvort leita þurfi eftir áliti nefndarinnar á slíkum flutningum. Frekar eigi að vera um tilkynningaskyldu að ræða. Meðan heilbrigðisyfirvöld heimila flutninga gerir nefndin ekki athugasemdir.

Refa og minkaeyðing

Sigurjón kynnti tillögu að nýjum samningi um refa- og minkaeyðingu.

Heildarkostnaður við málaflokkinn hefur verið um 9 milljónir. Ekki er unnt að reikna með meira en 2 milljónum í endurgreiðslu frá ríkinu.

Nokkuð rætt um stefnu landbúnaðarnefndar og hvort æskilegt sé að málaflokkurinn verði bæði á höndum umhverfis- og landbúnaðarnefndar. Menn sammála um að æskilegt sé að stunda bæði sumar og vetrarveiði. Vetrarveiðin mikilvæg.

Tillaga Sigurjóns var samþykkt. Sveinbjörn bendir á að sameiningin gefi nú tilefni til að fara yfir málaflokkinn í heild sinni og nefndin vill ítreka samþykkt sína frá fyrsta fundi. Hún hljóðar svo:

 Landbúnaðarnefnd óskar eftir því við byggðarráð Borgarbyggðar að eyðing vargs í sveitarfélaginu heyri undir nefndina.

Greinargerð:

Eyðing vargs hefur í seinni tíð verið skilgreint opinberlega sem umhverfismál.  Bæði í Borgarbyggð hinni fornu og Borgarfjarðarsveit fór þó landbúnaðarnefnd með málaflokkinn.  Þess er óskað að sami háttur verði hafður á í nýju sveitarfélagi.

Önnur mál

Fjárhagsáætlun. Verið er að vinna fjárhagsáætlun og fór Sigurjón yfir áætlun nefndarinnar.

Skipulögð hundahreinsun. Dreifbýlisfulltrúum er falið að kanna hvernig málum var háttað í sveitarfélögunum fyrir sameiningu og koma með tillögu að framtíðar fyrirkomulagi.

Rúlluplast. Þörf er á að fara af stað með rúlluplastsöfnun. Nefndin leggur til að það verði gert hið fyrsta og söfnunin auglýst.

Beitilönd Borgarbyggðar. Guðrún segir enn vera vandræðaástand í beitarhólfum. Sum hólfin eru verulega illa beitt og ástæða til að fara með hrossin annað. Vantar reglur um þessi beitarlönd og enn er ítrekað frá fyrsta fundi:

Borgarbyggð á nokkuð land í nágrenni Borgarness og er það að hluta leigt Hestamannafélaginu Skugga til afnota fyrir félagsmenn.  Um þessa landleigu gildir ákveðinn samningur.  Ljóst er að hluti þessa lands er mjög illa farinn og þolir ekki frekari beit.  Í samningi við Skugga er sérstaklega tekið á því hvernig skal farið með ef slík mál koma upp.  Nefndin beinir þeim tilmælum til sveitarstjórnar að nú þegar verði gerðar viðeigandi ráðstafanir þannig að landnýting á landi sveitarfélagsins verði í samræmi við landgæði og ef ástæða þykir til þá verði ákveðin beitarhólf friðuð.

Í framhaldi af þessari umræðu spannst það að landnýting almennt verður falin umhverfisnefnd í nýju sveitarfélagi.

Erindisbréf nefndarinnar.  Sveinbjörn ítrekar að nauðsynlegt sé að ganga frá erindisbréfi nefndarinnar.

Fyrirsvarsmenn jarða.  Á fundi 31. júlí var samþykkt að leita upplýsinga um fyrirsvarsmenn jarða. Nauðsynlegt að sú vinna verði kláruð.

Veiðimálastofnun.  Sveinbjörn leggur fram svohljóðandi tillögu:

Landbúnaðarnefnd Borgarbyggðar lýsir áhyggjum vegna stöðu Veiðimálstofnunar en skv. frumvarpi að fjárlögum er gert ráð fyrir óbreyttu framlagi til stofnunarinnar.  Hlutverk Veiðimálstofnunar er mjög mikilvægt bæði í grunn- og þjónusturannsóknum, ekki síst hið mikilvæga starf sem unnið er á útibúum stofnunarinnar eins og á Hvanneyri í Borgarfirði. 

Á Vesturlandi eru mörg af gjöfulustu veiðivötnum landsins og mjög mikilvægt að viðhalda þeim auðlindum og auka þekkingu á lífríki þeirra ásamt því að auka nýtingu þeirra vatna sem  lítt eða ekki eru nýtt nú.  Þar getur ráðgjöf Veiðimálastofnunar skipt sköpun til að nýting verði sjálfbær.

Nefndin skorar því á landbúnaðarráðherra og Alþingi að auka fjárframlög til stofnunarinnar þannig að hún verði í stakk búinn til að sinna hlutverki sínu.

Tillagan var efnislega samþykkt en ákveðið að vísa henni til Byggðaráðs.

Skýrsla um stöðu landbúnaðar

Á fyrsta fundi nefndarinnar var lögð fram tillaga um að unnin verði skýrsla um stöðu landbúnaðar í sveitarfélaginu. Afgreiðslu hennar var frestað en hún er svohljóðandi:

d)         Framlögð var svohljóðandi tillaga:

Landbúnaðarnefnd óskar eftir því við byggðaráð Borgarbyggðar, að fá heimild til að vinna skýrslu um stöðu landbúnaðar í sveitarfélaginu.  Skýrslan yrði unnin í samvinnu við Búnaðarsamtök Vesturlands, búnaðarfélög á svæðinu, Landbúnaðarháskóla Íslands á Hvanneyri, Vesturlandsskóga, Veiðifélag Borgarfjarðar og fleiri aðila ef þurfa þykir.  Í skýrslunni, sem skipt yrði upp eftir gömlu hreppamörkunum, kæmi fram hversu margar jarðir væru í ábúð, hvernig landbúnaður er stundaður þar, fjöldi búfjár, stærð skógræktarlanda, aðild að veiðifélagi og þá önnur starfsemi s.s. ferðaþjónusta, iðnaður eða önnur landnot ef einhver eru.  Þá er og nauðsynlegt að greina fjölda eyðijarða og þá hvernig þær eru nýttar.  Einnig er nauðsynlegt að greina hvort viðkomandi jörð er eignarjörð eða leigujörð.  Sérstaklega skal geta um jarðir í eigu sveitarfélagsins og ríkisins.

Greinargerð.

Ljóst er að miklar breytingar eiga sér nú stað í landnýtingu í Borgarbyggð.  Án upplýsinga um starfsemi á svæðinu og landnotkun er nefndin vanmáttug að greina kosti og galla, styrkleika og veikleika í greininni og móta þannig stefnu til framtíðar.  Ekki er gert ráð fyrir miklum skrifuðum texta heldur fyrst og fremst töflu er sýnir fjölda og stærð jarða og þá starfsemi sem þar er rekin, sé hún einhver.  Þá myndi þessi samantekt geta nýst í baráttu við ríkið þegar þjóðlendustormsveitin hyggur á strandhögg í sveitarfélaginu.

Tillagan lögð fram að nýju og samþykkt að fela dreifbýlisfulltrúum að vinna skýrsluna og leita eftir fjárveitingu til þess.

Fleira ekki gert og fundi slitið kl. 15.50