Byggðarráð Borgarbyggðar

Lögð fram auglýsing atvinnu- og nýsköpunarráðuneytisins um byggðakvóta fiskveiðiársins 2014 - 2015.

Borgarbyggð uppfyllir ekki þau skilyrði sem sett eru varðandi viðmið um úthlutun byggðakvóta á þessu fiskveiðiári.

Lagt fram fundarboð á framhaldsaðalfund og haustþing SSV 2014. Fundurinn verður haldinn í Búðardal 18. september.
Fulltrúar Borgarbyggðar verða Kolfinna Jóhannesdóttir, Björn Bjarki Þorsteinsson, Helgi Haukur Hauksson, Magnús Smári Snorrason og Ragnar Frank Kristjánsson.

Lagt fram fundarboð á framhaldsaðalfund Heilbrigðiseftirlits Vesturlands sem haldinn verður í tengslum við aðalfund SSV 18. september.
Fulltrúi Borgarbyggðar verður Kolfinna Jóhannesdóttir.

Lögð fram ályktun frá fundi Samtaka ungra bænda um varðveislu landbúnaðarlands.
Í ályktuninni eru sveitastjórnafulltrúar hvattir til að kynna sér og nýta heimildir í skipulagslögum við gerð aðal- og deiliskipulags til að varðveita landbúnaðarland.
Samþykkt að vísa erindinu til umhverfis-, skipulags og landbúnaðarnefndar.

Rætt um húsnæðismál í Brákarey og hvort segja eigi upp leigusamningum til að rýma fyrir annarri starfsemi.
Samningur er milli Borgarbyggðar og Árla ehf um hluta af iðnaðarhúsinu Brákarbraut 25 í Borgarnesi um fimm ára leigu frá 2009.
Byggðarráð samþykkti að segja upp samningum í samræmi við uppsagnarákvæði hans frá og með 31. okt 2014 til að rýmka fyrir möguleikum á nýtingu húsnæðisins fyrir starfsemi á vegum sveitarfélagsins. Uppsagnarfrestur eru 6 mánuðir.

Í ljósi framkominna ábendinga frá íbúafundi hefur umhverfis-, skipulags- og landbúnaðarnefnd lagt til að tillögu um umhverfisskipulag á skólaholti verði breytt. Horfið verði frá einstefnu í hverfinu, gangstéttar efst í Bröttugötu verði breikkaðar, gerð verði sleppistæði við grunnskólann og hugað verði að bættu umferðaröryggi í botnlanga Gunnlaugsgötu.
Byggðarráð samþykkti breytinguna.

Lögð fram skýrsla vinnuhóps um húsnæðismál Grunnskólans í Borgarnesi.
Byggðarráð þakkar vinnuhópnum fyrir skýrsluna.
Byggðarráð samþykkti að fela fræðslustjóra og forstöðumanni umhverfis- og skipulagssviðs að kynna skýrsluna fyrir starfsfólki, skólaráði og stjórn foreldrafélags Grunnskólans í Borgarnesi. Kynningin skal vera fyrir lok septembermánaðar.

Lagðar fram fundargerðir vinnuhóps um málefni leikskólans Hnoðrabóls 27. ágúst og 10. september s.l.
Búið er gera svót-greiningu á núverandi húsnæði og verið er að skoða forsendur fyrir kostnaðarmati á nýbyggingu í samanburði við endurbætur og viðbyggingu við núverandi skólahúsnæði.
Nefndin ætlar að vera með umræðufund með foreldrum síðar í september.

Lögð fram verðkönnunargögn sem bárust í viðhald á félagsheimilinu Lyngbrekku.
Verð bárust frá tveimur aðilum og samþykkti byggðarráð að taka lægra tilboðinu sem var frá SÓ-húsbyggingum kr. 9.729.186 sem er innan fjáhagsáætlunar verksins.

Lögð fram fundargerð vinnuhóps um stefnumótun í þjónustu við fatlaða frá 08. september s.l.

Lögð fram beiðni starfsmanna Búsetuþjónustunnar og Fjöliðjunnar um styrk til starfsmannaferðar í samræmi við reglur Borgarbyggðar.

Byggðarráð samþykkti að veita styrkinn og verður kostnaður tekinn af liðnum starfsmannamál.

Rætt um veikindaforföll í skólastofnunum Borgarbyggðar.
Skv. upplýsingum frá skólastjórum grunnskólanna má gera ráð fyrir umframkostnaði á þessu ári vegna langtímaveikinda starfsmanna.
Byggðarráð samþykkti að fela fræðslustjóra í samvinnu við skólastjóra að koma með tillögur um hvernig hægt er að mæta þessum kostnaði innan fjárhagsramma fræðslusviðs.

Lögð fram fundargerð stjórnar Samtaka sveitarfélaga á Vesturlandi frá 11. september s.l.

Lögð fram fundargerð 143. fundar starfsmanna Safnahúss Borgarfjarðar.

Rætt um endurskoðun aðalskipulags Borgarbyggðar sem sveitarstjórn vísaði til umfjöllunar í byggðarráði.
Byggðarráð samþykkti að óska eftir að umhverfis-, skipulags- og landbúnaðarnefnd taki til umfjöllunar þær athugasemdir sem komu þegar aðalskipulagið var í vinnslu á síðasta kjörtímabili.
Byggðarráð leggur til að umhverfis-, skipulags- og landbúnaðarnefnd haldi kynningarfund um aðalskipulag sveitarfélagsins.