Byggðarráð Borgarbyggðar

Lögð fram fundargerð aðalfundar og ársreikningur Landnámsseturs fyrir árið 2013.

Lagt fram bréf Kjartans Ragnarssonar dags. 03.10."14 þar sem óskað er eftir að kaupa hlut Borgarbyggðar í Landnámssetri Íslands ehf.
Byggðarráð tók vel í erindið og var sveitarstjóra falið að ræða við bréfritara.

Lagðar fram ályktanir svæðisþinga tónlistarskóla og ályktun samstöðufundar tónlistarskóla varðandi kjaramál.
Byggðarráð tekur undir að tónlistarnám hafi víðtækt hlutverk á sviði lista, mennta-, menningar- og samfélagsmála og
leggur áherslu á mikilvægi tónlistarnáms. Byggðarráð hvetur samningsaðila til að leysa kjaradeilur sem fyrst.

Lögð fram ályktun frá aðalfundi Skógræktarfélags Íslands 06. október 2014 þar sem lagt er til að unnið verði að samstilltu átaki opinberra aðila og skógræktarfélaga í að nýta lúpínubreiður til skógræktar, bæði í þéttbýli og víðsvegar um land.
Vísað til umhverfis-, skipulags- og landbúnaðarnefndar.

Lagt fram bréf Björgunarsveitarinnar Brákar með beiðni um frí árskort í íþróttamiðstöðinni í Borgarnesi.
Byggðarráð samþykkti að veita liðsmönnum björgunarsveita í Borgarbyggð 50% afslátt af árskortum í íþróttamiðstöðvum sveitarfélagsins.

Sveitarstjóri kynnti bréf Bjarna Kr. Þorsteinssonar slökkviliðsstjóra þar sem lögð er áhersla á mikilvægi þess að efla lögbundið eldvarnareftirlit á svæðinu.
Byggðarráð þakkar erindið og var sveitarstjóra falið að ræða við nágrannasveitarfélög um leiðir til að efla eldvarnareftirlit.

Lagt fram kynningarbréf vegna útgáfu DAI afsláttarkorts fyrir ferðamenn á Íslandi. Korthafar eiga að geta nýtt sér þjónustu og tilboð gegn framvísun kortsins.
Byggðarráð samþykkti að taka ekki þátt í verkefninu.

Á fundinn mættu Olgeir Helgi Ragnarsson, Elísabet Haraldsdóttir og Gunnlaug Gunnlaugsdóttir frá leikdeild umf. Skallagríms til viðræðna um vilja leikdeildarinnar að taka félagsheimilið Lyngbrekku á leigu.
Byggðarráð tekur jákvætt í erindið og var samþykkt að ræða við meðeigendur Lyngbrekku um málið.

Lagt fram bréf, dagsett 10. október 2014, frá Björgu Gunnardóttur umhverfis- og landbúnaðarfulltrúa fyrir hönd afréttarnefndar Þverárréttar. Nefndin fer fram á að kannað verði lögmæti þess að innheimta stofnkostnað afréttargirðinga og óskar eftir að fasteignamat á afréttinum verði leiðrétt. Þá óskar nefndin eftir framlagi frá aðalsjóði til að standa undir framangreindum gjöldum þar til leiðrétting hefur gengið í gegn.
Byggðarráð samþykkti að óska eftir áliti á lögmæti innheimtu stofnkostnaðarins en örum liðum frestað til næsta fundar.

Lagður fram endurnýjaður samningur frá Umhverfisstofnun um refaveiðar 2014-2016. Auk þess lagt fram bréf, dagsett 13. október, frá Björgu Gunnnardóttur umhverfis- og landbúnaðarfulltrúa.

Byggðarráð samþykkti samninginn en áréttar framkomnar athugasemdir sveitarfélagsins og lýsir vonbrigðum með að ekki hafi verið tekið tillit til þeirra af hálfu Umhverfisstofnunar.

Rætt um ágreining um girðingastæði í Krókslandi í Norðurárdal.
Lögð var fram fundargerð afréttarnefndar Þverárréttar frá 8. október s.l. þar sem fram kemur að eigenda Króks verði boðið samkomulag um að girða upp gömlu girðinguna sem liggur um hlíðina og að hann eignist um leið núverandi afréttargirðingu sem lendi innan þess hólfs.
Að öðrum kosti verði hugsanlega höfðað mál til að kanna hvort hefðarréttur sé ekki kominn á afnot af þessu landi.
Byggðarráð tók undir samþykkt nefndarinnar og var sveitarstjóra falið að vinna áfram að málinu.

Sveitarstjóri sagði frá frá fundi um fjarskiptamál sem haldinn var á Akureyri þar sem kynnt var ljósleiðaravæðing í dreifðum byggðum á Eyjafjarðarsvæðinu.
Einnig greindi sveitarstjóri frá fundi um eflingu fjarskiptasambands á Vesturlandi þar sem verið er að skoða möguleika á ljósleiðaravæðingu.
Samþykkt var að fela sveitarstjóra að halda áfram að vinna að verkefninu.

Framlagt bréf Capacent þar sem boðið er að fyrirtækið sjái um þjónustukönnun fyrir sveitarfélagið á þessu ári eins og undanfarin ár.
Byggðarráð samþykkti að Borgarbyggð taki ekki þátt í könnuninni að þessu sinni.
Jafnframt var samþykkt að ræða við Háskólann á Bifröst og Samtök sveitarfélaga á Vesturlandi um mögulegt fyrirkomulag viðhorfskannana meðal íbúa sveitarfélagsins.

Umhverfis-, skipulags- og landbúnaðarnefnd hefur óskað eftir við byggðarráð að mörkuð verði stefna um notkun húsnæðis sveitarfélagsins í Brákarey. Lögð var fram áfangaskýrsla frá árinu 2011 um fasteignir Borgarbyggðar í Brákarey. Einnig var lögð fram skýrsla vinnuhóps um nýtingu fasteigna Borgarbyggðar frá 2013.
Samþykkt að fela sveitarstjóra að láta gera reglur um notkun húsnæðis sveitarfélagsins í Brákarey.

Lagður fram leigusamningur við Inger Helgadóttir um 15 ferm rými í húsnæði Borgarbyggðar í Brákarey.
Byggðarráð samþykkti samninginn með fyrirvara um að leigutíminn verði til næstu áramóta en þá er gert ráð fyrir að nýjar reglur taki gildi.

Lögð fram umsögn Borgarbyggðar um drög að reglugerð um umdæmaskiptingu lögreglustjóra. Í umsögninni kemur fram að byggðarráð fagnar framkomnum drögum að reglugerð og ítrekar fyrri afstöðu sína um að mikilvægt sé að staðsetja aðalstöð lögreglustjóra í þeim þéttbýliskjarna sem er mest miðsvæðis í landshlutanum og greiðar samgöngur í allar áttir.

Byggðarráð samþykkti umsögnina.

Sveitarstjórn hefur samþykkt tillögu velferðarnefndar að byggðarráð tilnefni í vinnuhóp um stefnumótun í málefnum nýbúa og kalli eftir tilnefningum samanber erindisbréf.
Byggðarráð samþykkti að tilnefna Moniku Mazur, Sonju Lind Eyglóardóttur og Guðmund Smára Valsson í vinnuhópinn.
Samþykkt að fela félagsmálastjóra að kalla eftir tilnefningum frá öðrum í samræmi við erindisbréf.

Rætt um skipan bygginganefndar viðbyggingar við Grunnskólann í Borgarnesi.
Byggðarráð samþykkti að skipa Guðveigu Eyglóardóttur, Sigurð Guðmundsson og Unnstein Elíasson í bygginganefndina.

Á fundinn mætti Einar G. Pálsson fjármálafulltrúi og fór yfir samanburð á rekstri sveitarfélagsins við fjárhagsáætlun eftir fyrstu átta mánuði ársins. Í heild er rekstur innan fjárhagsáætlunar en nokkrir liðir þurfa sérstakrar athugunar við.
Byggðarráð ítrekar að forstöðumenn séu meðvitaðir um að ekki er heimilt skv. sveitarstjórnarlögum að fara fram úr fjárheimildum skv. fjárhagsáætlun. Telji þeir að rekstur viðkomandi stofnunar standist ekki áætlun er þeim skylt að tilkynna það til skrifstofustjóra eða sveitarstjóra.

Lagt fram bréf Vegagerðarinnar varðandi fjögurra ára samgönguáætlun 2015-2018 og umsóknir um framlög til verkefna í hafnargerð og sjóvörnum.
Samþykkt að vísa erindinu til umhverfis-, skipulags- og landbúnaðarnefndar.

Lagt fram bréf Guðmundar Inga Waage þar sem sveitarfélagið er hvatt til að beita sér fyrir því að slóða og eldri vegi ofan Seleyrar verði ekki lokað fyrir umferð þannig að hægt sé að komast á bíl á framangreinda staði.
Samþykkt að fela sveitarstjóra að ræða við landeigendur.

Lagt fram bréf Valdimars Reynissonar skógarvarðar á Vesturlandi dags. 13.10."14 varðandi girðingu í Ystutungu í Borgarbyggð.
Samþykkt að vísa erindinu til afréttarnefndar Borgarhrepps, Stafholtstungna og Norðurárdals vestan Norðurár.

Lögð fram fundargerð 145. fundar starfsmannafundar Safnahúss Borgarfjarðar.

Lagt fram fundarboð á aðalfund Orkuveitu Reykjavíkur - Eigna ohf sem haldinn var 14. október 2014.

Lögð fram fundargerð 819. fundar stjórnar Sambands íslenskra sveitarfélaga sem haldinn var 24.09."14.

Lögð fram fundargerð 820. fundar stjórnar Sambands íslenskra sveitarfélaga sem haldinn var 08.10."14.

Lögð fram fundargerð 206. fundar stjórnar Orkuveitu Reykjavíkur sem haldinn var 29. ágúst 2014.