Byggðarráð Borgarbyggðar

Lögð fram beiðni eigenda Stafholtsveggja í Stafholtstungum um tengingu við Vatnsveitu Varmalands.
Á fundinn mætti Jökull Helgason forstöðumaður umhverfis- og skipulagssviðs meðan að liðir 1. til 3. voru ræddir.
Fleiri íbúar á svæðinu hafa lýst áhuga á að tengjast vatnsveitunni og var ákveðið að boða þá til fundar til að ræða málið.

Lögð fram beiðni Ferðaþjónustunnar í Húsafelli þar sem óskað er eftir að Borgarbyggð leggi til brunahana í sumarhúsahverfinu í Húsafelli, en verið er að endurnýja vatnsveituna í Húsafelli um þessar mundir.
Samþykkt að vísa erindinu til umfjöllunar í umhverfis-, skipulags- og landbúnaðarnefnd.

Jökull kynnti tilboð í liðléttinga fyrir áhaldahús Borgarbyggðar.
Samþykkt að fela Jökli að afla frekari upplýsinga og verður málið rætt á næsta fundi byggðarráðs.

Lagt fram boð Arctic Circle um þátttöku í alþjóðaþingi Hringborðs Noðurslóða - Arctic Circle sem haldið verður í Hörpu í Reykjavík 31. október - 02. nóvember.
Byggðarráð þakkar gott boð.

Lagðar fram upplýsingar um umfang og kostnað vegna ráðgjafastarfa við endurskoðun á stjórnsýslu Borgarbyggðar.
Samþykkt að fela sveitarstjóra að ganga til samninga við Garðar Jónsson hjá R3-ráðgjöf um verkefnið. Kostnaður er um 840 þús og verður það tekið af liðnum þjónustusamningar í sameiginlegum kostnaði.

Lagt fram bréf Eftirlitsnefndar með fjármálum sveitarfélaga dags. 28.08."14 þar sem óskað er skýringa á frávikum frá áætlun í rekstri Borgarbyggðar á árinu 2013. Einnig var lagt fram svarbréf skrifstofustjóra við erindinu.
Í bréfi Eftirlitsnefndarinnar kemur fram að skuldaviðmið Borgarbyggðar sé 122% sem er innan við skuldaviðmið skuldareglu sveitarstjórnarlaga.
Eftirlitsnefndin hefur einnig óskað eftir að gerð verði útkomuspá fyrir árið 2014 og send til nefndarinnar. Unnið er að gerð hennar og verður hún send nefndinni innan tíðar.

Skrifstofustjóri kynnti stöðu vinnu við gerð útkomuspár fyrir rekstur Borgarbyggðar á árinu 2014. Samkvæmt spánni eru tekjur hærri en gert var ráð fyrir í áætlun en á móti koma aukin útgjöld vegna framúrkeyrslu á árinu. Einnig eru líkur á að söluhagnaður af eignum sem gert var ráð fyrir munu ekki skila sér.
Samþykkt að ræða málið á næsta fundi byggðaráðs.

Á fundinn mætti Einar G. Pálsson fjármálafulltrúi og lagði fram tillögur að fjárhagsáætlun 2015 eins og þær hafa borist frá forstöðumönnum stofnana.
Byggðarráð leggur áherslu á að allra leiða verði leitað til hagræðis í rekstri þannig að við fyrri umræðu verði upphaflegum markmiðum um rekstarafgang náð.

Lögð fram drög að erindisbréfi fyrir bygginganefnd nýbyggingar Grunnskólans í Borgarnesi.
Gerðar voru breytingar á erindisbréfinu og það samþykkt með áorðnum breytingum.

Sveitarstjóri greindi frá svörum Guðmundar B. Guðmundssonar eiganda Skógarkots í Borgarbyggð varðandi lokun á vegi ofan Seleyrar.
Landeigandi greinir frá ástæðum á lokun fyrir akandi umferð og bendir m.a. á að þar sem vegurinn sé í hans eigu beri hann ábyrgð á umferð um veginn.

Rætt um mögulega þáttöku Borgarbyggðar í umsókn um styrk í norðurslóðaáætlun Evrópusambandsins.
Magnús Smári kynnti verkefnið en Háskólinn á Bifröst mun taka þátt í verkefninu.
Samþykkt að Borgarbyggð sendi inn umsókn um þátttöku í því.
Magnús Smári tók ekki þátt í afgreiðslu vegna tengsla við verkefnið.

Lagður var fram undirskriftalisti frá börnum í Bjargslandi sem þau færðu sveitarstjóra með ósk um svæði til leikja eins og fótbolta.
Byggðarráð þakkar börnunum í Bjargslandi fyrir góða hugmynd og ætlar að finna gott svæði sem gæti hentað fyrir leikflöt.
Samþykkt að vísa erindinu til gerðar fjárhagsáætlunar ársins 2015.