Byggðarráð Borgarbyggðar

Á fundinn kom Kristján Finnur Kristjánsson umsjónarmaður fasteigna og kynnti erindi vegna brunavarna í félagsheimilum Borgarbyggðar. Samkvæmt byggingareglugerð þarf að setja brunaviðvörunarkerfi í þau hús þar sem fleiri en tíu gista en annars nægir að hafa staka reykskynjara.
Kristjáni falið að afla frekari gagna og kynna málið á næsta fundi byggðarráðs.

Lögð fram ályktun frá fundi íbúa í grennd við Hvítá vegna hugmynda Orkustofnunar um virkjanir í ánni. Í ályktuninni segir meðal annars: "Fundurinn lýsir eindreginni andstöðu sinni við framkomnar hugmyndir um virkjanir í Hvítá í Borgarfirði þar sem stór hluti undirlendis flestra jarða á svæðinu fer undir vatn. Um er að ræða dýrmætt land þar sem mest af því er ræktað eða ræktanlegt, einnig er möguleiki á miklum malarnámum á svæðinu. Hvítá er höfuðá mestu laxveiðiáa landsins, ekki má taka áhættu hvað laxagengd í þær ár varðar. Bleikjustofn árinnar er verðmætur og þarf að verja hann. Fundurinn beinir því til sveitarstjórnar Borgarbyggðar og leggur á það þunga áherslu að virkjun verði ekki sett inn á aðalskipulag sveitarfélagsins."
Á fund byggðarráðs kom Stefán Gíslason formaður formaður verkefnisstjórnar verndar- og orkunýtingaráætlunar og kynnti rammaáætlun og virkjunarkosti í Borgarfirði.
Samþykkt að óska eftir því við Stefán að halda samskonar kynningu fyrir íbúa í nágrenni Hvítár.

Lögð fram umsókn um stofnun lóðarinnar Laugarhóll 3 í landi Laugarhóls 2.

Byggðarráð samþykkir að lóðin verði stofnuð.

Lagt fram boð á aðalfund Veiðifélags Langár sem fer fram í Langárbyrgi laugardaginn 18. apríl klukkan 16.
Einar Ole Pedersen verður fulltrúi Borgarbyggðar á aðalfundinum og fer með bæði atkvæði sveitarfélagsins.

Lagt fram boð á aðalfund Lánasjóðs sveitarfélaga ohf. sem fram fer í Salnum í Kópavogi 17. apríl nk. Vakin er athygli á því að allir sveitarstjórnarmenn eiga rétt á að sækja aðalfundinn.

Kolfinna Jóhannesdóttir sveitarstjóri verður fulltrúi Borgarbyggðar á fundinum.

Lagt fram til kynningar boð á aðalfundi opinberra hlutafélaga í eigu Orkuveitu Reykjavíkur sef. Orkuveita Reykjavíkur á þrjú opinber hlutafélög sem öll boða nú til aðalfunda vegna ársins 2014. Fulltrúar í sveitarstjórnum eigenda OR, stjórnarmenn félaganna sem og fulltrúar fjölmiðla hafa seturétt á fundunum. Fundirnir verða haldnir á Bæjarhálsi 1 föstudaginn 10. apríl 2015.

Fræðslunefnd óskaði eftir því á 122. fundi að kostnaður vegna framkvæmda og búnaðarkaupa fyrir íþrótta- og tómstundaskólann yrði færður inn í viðauka við fjárhagsáætlun ársins 2015. Kostnaður við framkvæmdirnar er um 2,7 milljón krónur.

Byggðarráð samþykkir að kostnaður verði færður á liði vegna framkvæmda og viðhalds sem áætluð voru á árinu 2015 og að dregið verði úr öðrum framkvæmdum/viðhaldi sem því nemur.

Lagt fram bréf frá Sambandi garðyrkjubænda þar sem óskað er eftir styrk frá sveitarfélaginu vegna gerðar heimildarmyndar um garðyrkju á Íslandi í 60 ár.
Byggðarráð sér sér ekki fært að styrkja verkefnið.

Á fundinn kom Oddur Jónsson frá KPMG og lagði fram og kynnti ársreikning Borgarbyggðar fyrir árið 2014.
Aldís Arna Tryggvadóttir sviðsstjóri fjölskyldu- og fjármálasviðs, Eiríkur Ólafsson fjármálastjóri og Rebekka Þiðriksdóttir aðalbókari sátu fundinn á meðan þessi liður var ræddur.
Samþykkt að vísa ársreikningnum til fyrri umræðu í sveitarstjórn.

Lagt fram erindi frá stjórn Handverkssjóðs félags iðnaðarmanna í Borgarnesi þar sem óskað er eftir tilnefningu frá Borgarbyggð í stjórnina.
Samþykkt að Ragnar Frank Kristjánsson verði fulltrúi Borgarbyggðar í stjórninni.

Lagt fram erindisbréf og framkvæmdaáætlun fyrir barnaverndarnefnd Borgarfjarðar og Dala.
Í samræmi við 9. gr. barnaverndarlaga nr. 80/2002 samþykkir byggðarráð framlagða framkvæmdaáætlun.

Fundargerð 213. fundar stjórnar Orkuveitu Reykjavíkur lögð fram.

Lögð fram fundargerð 155. starfsmannafundar í Safnahúsi.

Lögð fram fundargerð 827. fundar stjórnar Sambands íslenskra sveitarfélaga.

Lagt fram bréf frá Sambandsþingi UMSB þar sem sveitarfélaginu eru færðar þakkir fyrir samstarf og stuðning á liðnu ári.

Íbúaskrá 1. desember 2014 lögð fram til kynningar.

Lagðar fram upplýsingar um ráðstefnu um skólabyggingar sem fram fer í Framhaldsskólanum í Mosfellsbæ 21. maí næstkomandi.

Lögð fram fundargerð aðalfundar Nemendagarða Menntaskóla Borgarfjarðar.

Lögð fram fundargerð aðalfundar Sorpurðunar Vesturlands.