Byggðarráð Borgarbyggðar

Lögð fram kæra á álögð fjallskilagjöld á landverð jarðarinnar Dalsmynni í Norðurárdal.
Samþykkt að fela verkefnastjóra að taka saman upplýsingar og lögfræðingi að svara erindinu.

Sveitarstjórn vísaði til byggðarráðs erindi sem tekið var fyrir á fundi fjallskilanefndar Rauðsgilsréttar varðandi landleigu og uslagjald vegna Rauðsgilsréttar.
Samþykkt að fela umhverfis- og skipulagssviði að vinna að málinu.

Lögð fram ályktun stjórnar Heimilis og skóla um niðurskurð í leik- og grunnskólum landsins.

Lögð fram beiðni um endurútreikning fasteignagjalda á árinu 2015 vegna Skúlagötu 19a þar sem að mat fasteignarinnar var breytt við gerð skiptayfirlýsingar.
Samþykkt að verða við beiðninni.

Lagt fram bréf Ferðamálastofu dags. 18.01."16 varðandi breytingu á starfsreglum Framkvæmdasjóðs ferðamannastaða varaðandi úthlutun styrkja úr sjóðnum.
Borgarbyggð á þrjár umsóknir um styrk inni í sjóðnum og hefur þeim verið breytt í samræmi við starfsreglurnar.

Lagður fram kaupsamningur um sölu á Húsmæðraskólanum á Varmalandi til Iceland incoming ferðir ehf.
Byggðarráð samþykkti samninginn.

Rætt um auglýsingu eftir sveitarstjóra til starfa fyrir Borgarbyggð.
Leitað hefur verið upplýsinga um verð og verklag hjá sex ráðningarstofum varðandi vinnu við ráðningu.
Í ljósi niðurstöðu þeirra var samþykkt að fela fjármálastjóra að semja við Hagvang að sjá um ráðningarferlið.

Rætt um verkefnið Brúin til framtíðar sem hófst á síðasta ári.
Samþykkt að fela fjármálastjóra að ganga til samninga við KPMG ehf um framhald á því verkefni og fleiri fjármálaleg viðfangsefni fyrir sveitarfélagið.

Fyrir nokkru auglýsti Borgarbyggð eftir aðilum til að leggja ljósleiðara í Borgarbyggð. Þrír aðilar sýndu því áhuga að byggja og e.t.v. reka ljósleiðaranet í sveitarfélaginu.
Páll S. Brynjarsson framkvæmdastjóri Samtaka sveitarfélaga á Vesturlandi og Gestur Grétarsson tölvuumsjónarmaður hjá Borgarbyggð mættu á fundinn.
Samtök sveitarfélaga á Vesturlandi eru að fara af stað með könnun á áhuga notenda í dreifbýli fyrir að fá ljósleiðara. Málið verður rætt á ný þegar niðurstaða úr þeirri könnun liggur fyrir.

Lögð fram beiðni Reykjavíkurborgar um að gerð verði eigendastefna fyrir Faxaflóahafnir sf og óskað eftir tilnefningu í eigendanefnd. Borgarbyggð og Skorradalshreppur eiga sameiginlega að tilnefna fulltrúa.
Byggðarráð samþykkti að Sigrún Þormar verði fulltrúi í eigendanefndinni.

Rætt um þjónustusamninga við Skorradalshrepp.
Samþykkt að fela forseta sveitarstjórnar og fjármálastjóra að ganga til samninga á grundvelli fyrirliggjandi samningsdraga.

Sveitarstjórn vísaði til byggðarráðs tillögu velferðarnefndar um fjölgun þjónustuíbúða í Borgarbyggð.
Afgreiðslu frestað og fjármálastjóra falið að afla frekari upplýsinga.

Lagt fram minnisblað framkvæmdastjóra Samtaka sveitarfélaga á Vesturlandi varðandi fyrirhugaða fræðsluferð sveitarstjórnarmanna og embættismanna af Vesturlandi.
Byggðarráð gerir ekki ráð fyrir að fulltrúar frá Borgarbyggð taki þátt í ferðinni.

Borgarbyggð hefur boðið stjórn Vélabæjar ehf að kaupa hlut sveitarfélagsins í félaginu. Lagt var fram svar stjórnarinnar þar sem samþykkt er að kaupa hlutinn.
Samþykkt að taka tilboði stjórnarinnar.

Samþykkt að fela fjármálastjóra að senda starfsmanni Búnaðarþings skýrslu sem unnin var á vegum sveitarfélagsins um Landbúnaðarháskóla Íslands þar sem málefni landbúnaðarháskóla verða til umfjöllunar á þinginu.

Lögð fram fundargerð frá 122. fundi stjórnar Samtaka sveitarfélaga á Vesturlandi.
Einnig var lagt fram boð á fund sem haldinn verður 2. mars n.k. um samstarf sveitarfélaga á Vesturlandi um málefni fatlaðra.
Formanni velferðarnefndar, sviðsstjóra fjölskyldusviðs og félagsmálastjóra var falið að mæta á fundinn.

Lögð fram fundargerð starfsmannafundar í Safnahúsinu sem haldinn var 18.02."16.

Lögð fram fundargerð félagsfundar í Veiðifélagi Norðurár sem haldinn var 20.01."16

Lagt fram erindi frá nefndasviði Alþingis þar sem óskað er umsagnar um tillögu til þingsályktunar um embætti umboðsmanns skuldara.

Lagt fram erindi frá nefndasviði Alþingis þar sem óskað er umsagnar um frumvarp til laga um sveitarstjórnarlög (fjöldi fulltrúa í sveitarstjórn).

Lagt fram erindi frá nefndasviði Alþingis þar sem óskað er umsagnar um þingsályktun um uppbyggingu áningarstaða Vegagerðarinnar við þjóðvegi.
Vísað til umhverfis- og skipulagssviðs.

Lagt fram erindi frá nefndasviði Alþingis þar sem óskað er umsagnar um frumvarp til laga um sveitarstjórnarlög (uppbygging ferðamannastaða).

Rætt um erindi Borgarbyggðar til Jöfnunarsjóðs varðandi framlag vegna bankaskatts.
Samþykkt að vinna áfram að málinu.

Rætt um skipan vinnuhópa sem eru að störfum.
Tilkynnt verður um fulltrúa í vinnuhópunum á næsta fundi byggðarráðs.

Rætt um atvinnumál.
Á fundinn mætti Gunnar Gunnarsson frá Aurora Seafood ehf til viðræðna.