Byggðarráð Borgarbyggðar

Framhaldið undirbúningi að ákvörðun fjárheimilda fyrir árið 2018. Eiríkur Ólafsson, sviðsstjóri fjármála- og stjórnsýslusviðs, mætti til fundarins. Hann lagði fram ýmis gögn varðandi fjárhags- og framkvæmdaáætlun fyrir árið 2018 og skýrði þau út. Byggðarráð ræddi framlögð gögn ítarlega.

Framlögð til kynningar gagnstefna á hendur sveitarstjóra Borgarbyggðar f.h. Borgarbyggðar af hálfu eiganda Króks í Norðurárdal, dags. 4. okt. 2017. Þar er gerð krafa um að óheimilt sé að safna fé sem rennur að hausti á land jarðarinnar Króks og reka það fé af fjalli til réttar um land Króks. Sveitarstjóri kynnti innihald stefnunnar. Guðjón Ármannsson, lögmaður hjá Lex lögmannsstofu mun annast vörn í málinu f.h. Borgarbyggðar.

Framlagður eignaskiptasamningur vegna íbúða á Varmalandi ásamt tillögu að lóðarheiti. Verkís annaðist vinnslu samningsins. Lóðaleigusamningur er einnig frágenginn og unnið er að því að afgreiða fyrrgreind skjöl á formlegan hátt svo afhending íbúðanna geti farið fram sem fyrst.

Framlögð umsókn Grímshúsfélagsins, dags. í október 2017, þar sem farið er fram á árlegt framlag til uppbyggingar Grímshúss næstu fimm árin. Sveitarstjóra falið að koma á viðræðum við stjórn Grímshúsfélagsins um framtíð hússins.

Framlagt minnisblað sveitarstjóra, dags. 23.10 2017, þar sem lagt er til að ráðinn verði starfsmaður í allt að þrjá mánuði á umhverfis- og skipulagssvið til að annast verkefni sem fyrst og fremst tengjast könnun á byggingarstigi skráðra en ófrágenginna fasteigna í sveitarfélaginu. Þær eru samtals um 430 talsins. Einnig voru tilgreind önnur verkefni sem slíkur starfsmaður gæti unnið. Byggðarráð samþykkti erindið og fól sveitarstjóra að annast framkvæmd málsins.

Framlögð til kynningar gjaldskrá Sorpurðunar Vesturlands fyrir árið 2018.

Framlagður samningur við hjúkrunarheimilið Brákarhlíð um kaup á matarbökkum vegna heimsendingarþjónustu á mat til eldri borgara og fatlaða í Borgarbyggð. Með samningnum er komin formfesta á fyrirkomulag sem hefur verið við lýði milli þessara aðila um áraraðir. Byggðarráð samþykkti samninginn.
Björn Bjarki vék af fundi við afgreislu þessa liðar.

Nýráðinn rektor Landbúnaðarháskóla Íslands, Sæmundur Sveinsson, mætti til fundar við byggðarráð. Farið var yfir ýmis mál sem varða LBHÍ og tengjast sveitarfélaginu.

Framlagt minnisblað sveitarstjóra, dags. 24. okt. 2017 varðandi framhalds ljósleiðaraverkefnis, að því gefnu að framlög úr Fjarskiptasjóði verði í samræmi við fyrirliggjandi áætlanir sjóðsins.

Byggðarráð samþykkti eftirfarandi:
a.
Verkefnið um lagningu ljósleiðara um dreifbýli Borgarbyggðar beri nafnið Borgarljós.
b.
Gjald sem móttakandi greiðir fyrir tengingu í hvern tengipunkt (íbúðarhús og fyrirtæki) verði 250.000 krónur.