Byggðarráð Borgarbyggðar

Framlagt til kynningar opið bréf til sveitarstjórnar frá Hilmari Arasyni, formanni Einkunnanefndar, og fleirum þar sem gerð er krafa um að lýsingu á breytingu á aðalskipulagi Borgarbyggðar 2010-2022 sem fór fram til undirbúnings að auglýsingu á breytingu á aðalskipulagi Borgarbyggðar vegna fyrirhugaðs skotæfingasvæðis í landi Hamars fari fram aftur.

Framlögð til kynningar frétt frá Sambandi íslenskra sveitarfélaga um ákvæði nýrra persónuverndarlaga og þær ofursektir sem fyrirhugað er að leggja á íslensk sveitarfélög verði misbrestur á framkvæmd persónuverndarlaga. Byggðarráð tekur undir málflutning Sambands íslenskra sveitarfélaga í þessu efni og hvetur það til að beita öllum tiltækum áhrifum til að gera ákvæði fyrirhugaðra laga um persónuverndarákvæði framkvæmanleg.

Framlagt til kynningar minnisblað sviðsstjóra fjölskyldusviðs um fyrirkomulag skólamötuneytis og kennslu í Grunnskólanum í Borgarnesi á vetri komanda. Ljóst er að bregðast verður við áhrifum byggingarframkvæmda í skólanum með því að útvega annað kennsluhúsnæði að hluta svo og að bregðast við því að Hótel Borgarnes sagði upp samningi við grunnskólann um skólamáltíðir.
Skólinn tekur Bjössaróló í fóstur og verður það hluti af smíðakennnslu.

Framlagðar til kynningar niðurstöður rannsóknar á högum og líðan barna í Grunnskólanum í Borgarnesi og í Grunnskóla Borgarfjarðar. Byggðarráð þakkaði skýrsluna sem gefur verðmætar upplýsingar um þennan þátt skólastarfsins. Fyrirhugað er að kynna skýrslurnar fyrir skólasamfélaginu í haust.

Framlagar upplýsingar um arðsemiskröfur til starfsþátta innan samstæðu Orkuveitu Reykjavíkur.

Framlagt minnisblað formanns vinnuhóps um undirbúning að endurskoðun aðalskipulags Borgarbyggðar. Byggðarráð vísaði minnisblaðinu til komandi sveitarstjórnar. Jónína Erna fór yfir vinnu hópsins og minnisblaðið.

Framlagðar myndir af rusli í fjörunni við Fjóluklett. Byggðarráð samþykkti að verja allt að 1.000.000.- kr. til hreinsunar á svæðinu.

Framlagður tölvupóstur, dags. 22. Maí, frá skólameistara MB er varðar skólaakstur fyrir nemendur MB úr dreifbýli Borgarbyggðar. Byggðarráð vísaði erindinu til byggðarráðs komandi sveitarstjórnar.

Lögð fram útboðsgögn og verklýsing vegna útboðs á lagningu ljósleiðara í Borgarbyggð. Ríkiskaup sendir gögnin. Byggðarráð samþykkti að fela Ríkiskaupum að auglýsa útboð verksins að aflokinni afgreiðslu sveitarstjórnar.

Framlögð áskorun stjórnar Nemendafélags Grunnskólans í Borgarnesi dags. 18.5.2018 um að byggð verði hreystibraut á endurnýjaðri skólalóð. Byggðarráð þakkar erindið og vísar því til byggingarnefndar skólans.
Geirlaug situr hjá vegna tengsla við aðila máls.