Byggðarráð Borgarbyggðar

Lagt fram erindi Ingveldar Ingibergsdóttur f.h. hlaupahópsins Flandra varðandi hita og ljós á íþróttavelli. Byggðarráð þakkar ábendinguna og felur sveitarstjóra að vera í sambandi við Rarik og forstöðumann íþróttamannvirkja.

Framlagt bréf lögfræðings Gunnlaugs A. Júlíussonar.
Byggðarráð felur Oddi Ástráðssyni, lögmanni að svara bréfinu í samræmi við umræður á fundi.

Lögð fram tillaga um tekjumörk vegna afsláttar fasteignaskatta fyrir árið 2020.
Byggðarráð samþykkir tillöguna og leggur þá ákvörðun fyrir sveitarstjórn til staðfestingar.

Framlagt minnisblað frá Gagnaveitu Reykjavíkur vegna ljósleiðaralagnar í Andakíl.

Framlagt svar Borgarbyggðar við erindi Guðmundar Inga Waage varðandi vatns - og fráveitugjöld í Borgarbyggð.

Framlagðir eru samningar frá 2003 og 2005 sem Borgarbyggð og Orkuveita Reykjavíkur hafa gert með sér vegna vatns- og fráveitu. Einnig er lagt fram minnisblað sem tekið var saman í janúar 2014 af rýnihóp eigenda Orkuveitu Reykjavíkur til að varpa ljósi á forsendur fráveitusamninga Borgarbyggðar og Orkuveitu Reykjavíkur. Út frá þessum samningum eru gjaldskrár vatns og fráveitu gefnar út.
Svör Veitna eru ekki til eftirbreytni og hefur fulltrúi Borgarbyggðar í stjórn komið því á framfæri við forsvarsmenn Veitna að vanda verði samskipti og svör við íbúa.

Byggðarráð samþykkir að Lilja Björg Ágústsdóttir taki sæti í nefndinni fyrir hönd Borgarbyggðar og leggur þá ákvörðun fyrir sveitarstjórn til staðfestingar.

Lagt fram erindi frá Landnámssetri Íslands varðandi upplýsingamiðstöð. Bréfritarar lýsa yfir áhuga á því að reka upplýsingarmiðstöð í samstarfi við sveitarfélagið.
Byggðarráð þakkar fyrir erindið og þann áhuga sem verkefninu er sýndur. Hefur Atvinnu- markaðs- og menningarmálanefnd verið falið að vinna áfram að framtíðarlausn á rekstri upplýsingarmiðstöðvar fyrir hönd sveitarfélagsins og hefur nú þegar fundað með fulltrúum frá Landnámssetri Íslands.

Framlögð drög að reglum um innheimtu fæðis- og frístundagjalda í grunnskólum Borgarbyggðar.
Byggðarráð samþykkir framkomin drög að reglum um innheimtu fæðis- og frístundagjalda í grunnskólum og vísar þeirri ákvörðun til sveitarstjórnar til staðfestingar.

Lagt er til að Lilja Björg Ágústsdóttir taki sæti varamanns í stjórn Snorrastofu og þeirri ákvörðun vísað til sveitarstjórnar til staðfestingar.

Byggðarráð vísar efni bókunarinnar til fjallskilanefndar Borgarbyggðar. Nefndinni er falið að kanna hvort hægt er að virkja ákvæði 6. gr. fjallskilasamþykktar 638/2015 á tilteknum svæðum.

Fram lagt erindi Sonju Estrajher Eyglóardóttur og Guðrúnar Jónsdóttur um verndun bæjarlandslags í Borgarnesi. Um er að ræða erindi til ítrekunar fyrra erindis.
Byggðarráð þakkar fyrir erindið og telur að aðgerða sé þörf til að sporna við aukningu ágengra plantna í Borgarnesi. Vísar byggðarráð málinu til umfjöllunar inn í Umhverfis- og landbúnaðarnefnd.

Lagt fram erindisbréf hópsins en hlutverk hans er að gera tillögu um framtíðarstarfssemi Öldunnar í Borgarnesi. Byggðarráð skipar þrjá fulltrúa til að starfa í hópnum og skal einn þeirra fulltrúa vera úr velferðarnefnd. Með hópnum starfa sviðsstjóri fjölskyldusviðs og félagsmálastjóri. Einnig skulu sviðsstjóri umhverfis- og skipulagssviðs og verkefnastjóri framkvæmdarsviðs vinna með starfshópnum að skipulagi húsnæðismála í Öldunnar.
Byggðarráð tilnefnir Silju Eyrúnu Steingrímsdóttur, Friðrik Aspelund og Finnboga Leifsson til að starfa í hópnum og leggur þá á ákvörðun fyrir sveitarstjórn til staðfestingar.

Til sveitarfélagsins hafa leitað þrír verktakar úr Borgarbyggð og lýst yfir áhuga á því að koma á samstarfsverkefni um uppbyggingu íbúðarhúsnæðis í hverfinu í Bjargslandi.
Byggðarráð ræddi möguleika til samstarfs við verktakana og með hvaða hætti sveitarfélagið getur komið að slíku samstarfi. Var sveitarstjóra falið að koma á fundi og ræða nánar útfærslur við verktakana í ljósi umræðna á fundinum og næstu skref. Var Kristni Bjarnasyni lögmanni falið að undirbúa drög að samkomulagi.
Ljóst er að sveitarfélagið þarf að fara í skipulagsbreytingu á svæðinu ef af verður og var því skipulagsfulltrúa Borgarbyggðar falið að vinna þann hluta málsins áfram og leggja það fyrir skipulags - og byggingarnefnd.

Framlagður að nýju samningur milli Orkufjarskipta og Borgarbyggðar vegna ljósleiðaralagnar í landi Snjófjalla.
Byggðarráð samþykkir samning á milli Orkufjarskipta og Borgarbyggðar og vísar þeirri ákvörðun til sveitarstjórnar til staðfestingar.

Fram lögð tillaga að sameiginlegri lögreglusamþykkt fyrir Vesturland.
Byggðarráð ræddi tillögunar og felur sveitarstjóra og sviðsstjóra stjórnsýslusviðs að yfirfara tillöguna áður en hún verður lögð fram til samþykktar.

Framlögð umsókn Skátafélags Borgarness um styrk til starfssemi sinnar fyrir árið 2019.
Byggðarráð þakkar erindið en bendir á að nú fara allar afgreiðslur styrkumsókna vegna starfsstyrkja í gegn um UMSB. Er erindinu því vísað til UMSB til umsagnar.

Framlagður póstur frá sambandi íslenskra sveitarfélaga varðandi þörf á breytingum á samþykktum sveitarfélaga í kjölfar lagabreytinga.
Byggðarráð felur sviðsstjóra stjórnsýslusviðs að forma tillögu að breytingum á samþykktum Borgarbyggðar og leggja síðan fyrir sveitarstjórn.

Umhverfis- og samgöngunefnd Alþingis sendir til umsagnar tillögu til þingsályktunar um fimm ára samgönguáætlun fyrir árin 2020-2024, 434. mál og tillögu til þingsályktunar um samgönguáætlun fyrir árin 2020 - 2034, 435. mál.