Byggðarráð Borgarbyggðar

Lögð fram umsókn skólastjóra Tónlistarskólans um styrk til starfsmanna skv. reglum um ferðastyrki en starfsmenn skólans eru að fara í námsferð til Vínarborgar.
Samþykkt að veita starfsmönnunum styrk að upphæð kr. 10.000 pr starfsmann.

Lögð fram umsókn Vegagerðarinnar um stofnun tveggja lóða vegna vegagerðar. Annars vegar 0,3 ha lóðar úr landi Samtúns og 4,53 ha lóðar úr landi Grófar í Reyholtsdal. Fyrir liggja samningar við landeigendur.
Byggðarráð samþykkti að lóðirnar yrðu stofnaðar.

Lögð fram beiðni Votlendisseturs Íslands á Hvanneyri um styrk við endurheimt votlendis.
Vísað til umsagnar umhverfis- og skipulagssviðs.

Lagt fram bréf Félags nýrra Íslendinga um að halda Þjóðahátíð Vesturlands í Hjálmakletti á næsta ári. Einnig er farið fram á styrk vegna hátíðarinnar.
Vísað til umsagnar Borgarfjarðarstofu.

Lagt fram fundarboð á félagsfund Veiðifélags Gljúfurár sem haldinn verður 28. nóvember 2012.
Samþykkt að Sigurjón Jóhannsson verði fulltrúi Borgarbyggðar á fundinum.

Á fundinn mætti Einar G. Pálsson fjármálafulltrúi og lagði fram yfirlit yfir rekstur Borgarbyggðar fyrstu tíu mánuði ársins 2012.

Lagt fram framvindumat frá Framkvæmdasýslu ríkisins vegna byggingar hjúkrunarálmu, en þar kemur fram að búið er að gefa út viðtökuvottorð vegna framkvæmdarinnar.
Byggðarráð leggur áherslu á að bygginganefnd skili sem fyrst áfangaskýrslu til Borgarbyggðar.

Lögð fram gögn vegna fyrirhugaðra breytinga á samningi Borgarbyggðar og Orkuveitu Reykjavíkur um rekstur fráveitu.
Byggðarráð leggur áherslu á að gjaldskrár eigenda Orkuveitunnar verði samræmdar.

Lagt fram bréf Skeljungs hf. dags. 16.11."12 varðandi hækkun Brúartorgs við Stöðina í Borgarnesi.
Vísað til gerðar fjárhagsáætlunar.

Lögð fram kostnaðaráætlun frá Fornbílafjelagi Borgarfjarðar vegna breytinga í frystiklefum vegna aukinnar aðstöðu fyrir klúbbinn.
Vísað til umsagnar umhverfis- og skipulagssviðs.

Lagt fram erindi eigenda fimm lögbýla í Stafholtstungum sem óska eftir tengingu bæjanna við vatnsveitu Borgarbyggðar á Varmalandi.
Samþykkt að fela umhverfis- og skipulagssviði að afla frekari upplýsinga um málið.

Rætt um fjárhagsáætlun Borgarbyggðar fyrir árin 2013 - 2016.
Lagðar fram nokkrar hugmyndir um lækkun rekstarkostnaðar á áætlun 2013.
Á fundinn mætti Jökull Helgason forstöðumaður umhverfis- og skipulagssviðs til viðræðna um tillögur um framkvæmdaáætlun.

Lagt fram erindi deildarstjóra námsversins Kletts í Grunnskólanum í Borgarnesi dags. 02.11."12 þar sem óskað er eftir breytingum á húsnæði námsversins.
Samþykkt að bjóða húsnæðishóp Grunnskólans í Borgarnesi á næsta fund byggðarráðs.

Á fundinn mætti Sigurður Guðmundsson sambandsstjóri Ungmennasambands Borgarfjarðar til viðræðna um stefnumótunarvinnuna.
Lagt fram erindi frá sambandsstjóra UMSB þar sem óskað er eftir frekari stuðningi við stefnumótunarvinnu UMSB og Borgarbyggðar í íþróttamálum.
Samþykkt að fela sveitarstjóra að ræða við fulltrúa UMSB um erindið.

Lagt fram minnisblað félagsmálastjóra dags. 19.11."12 varðandi þjónustu við eldri borgara og uppsetningu öryggishnappa.
Samþykkt að óska eftir að félagsmálastjóri og formaður velferðarnefndar komi á næsta fund byggðarráðs til viðræðna um erindið.

Lagt fram erindi frá undirbúningshópi um stofnun jarðvangs í Ljósufjöllum.
Samþykkt að fela sveitarstjóra og formanni umhverfis- og skipulagsnefndar að ræða við forsvarsmenn verkefnisins.
Jafnframt leggur byggðarráð áherslu á að landeigendum verði kynnt verkefnið.

Lögð fram drög að erindisbréfi vinnuhóps um nýtingu fasteigna Borgarbyggðar.
Byggðarráð gerði athugasemdir við erindisbréfið og var það samþykkt með áorðnum breytingum.
Í vinnuhópnum verða Jónína Erna Arnardóttir, Ragnar Frank Kristjánsson, Geirlaug Jóhannsdóttir og Jenný Lind Egilsdóttir.

Lagt fram kauptilboð í hluta jarðarinnar Syðri-Hraundals í Borgarbyggð.
Samþykkt að fela sveitarstjóra að gera gagntilboð.

Lagt fram bréf frá Hestamannafélaginu Faxa þar sem óskað er eftir stuðningi til að ráðast í lagfæringar á íþróttasvæði Skugga í Borgarnesi í tengslum við Íslandsmót í hestaíþróttum sem fram fer í Borgarnesi n.k. sumar.
Samþykkt var að fela sveitarstjóra að ræða við bréfritara.

Rætt um skólaakstur í grunnskóla.
Samþykkt að óska eftir því við fræðslunefnd að gera drög að reglum um skólaakstur.

Rætt um vegamál í Borgarbyggð.
Samþykkt að óska eftir fundi með vegamálastjóra um vegamál og umferðaröryggi í Borgarbyggð.

Lögð fram fundargerð 103. stjórnarfundar Faxaflóahafna sem haldinn var 9. nóvember s.l.