Byggðarráð Borgarbyggðar

Á fundinn mætti Jökull Helgason forstöðumaður umhverfis- og skipulagssviðs og sat fundinn meðan liður nr. 1 - 4 voru ræddir.
Rætt um uppsetningu brunahana í Húsafelli en sveitarstjórn vísaði erindinu til umfjöllunar í byggðarráði.
Lagðar fram tillögur að reglum um kostnaðarþátttöku sveitarfélagsins við uppsetningu brunahana í sumarhús- og íbúðarhverfum á landi í einkaeigu.
Byggðarráð samþykkti að hafna beiðni um að taka þátt í kostnaði við uppsetningu brunahana í Húsafelli.

Lögð fram tillaga að leiksvæði í Bjargslandi en sveitarstjórn vísaði erindinu til umfjöllunar í byggðarráði. Deiliskipulag gerir ráð fyrir að leiksvæði verði við Arnarklett.
Samþykkt að vísa erindinu til fjárhagsáætlunar 2015.

Lögð fram tillaga að gjaldskrá um gatnagerðar-, byggingaleyfis-, skipulags- og önnur þjónustugjöld umhverfis- og skipulagssviðs Borgarbyggðar.
Samþykkt að vísa tillögunni til umfjöllunar í umhverfis-, skipulags- og landbúnaðarnefnd.

Lögð fram útboðsgögn á rekstri tjaldsvæða í eigu Borgarbyggðar.
Samþykkt að bjóða út reksturinn.

Lagt fram bréf nema við Tónlistarskóla Borgarfjarðar vegna kjaradeildu tónlistarkennara og sveitarfélaganna.

Lögð fram tillaga um tímasetningar á viðtalstímum sveitarstjórnar frá áramótum fram á vor.
Byggðarráð samþykkti að fundir verðir haldnir annan hvern mánuð fram til vors.

Sveitarstjóri kynnti tillögur Garðars Jónssonar hjá R3 Ráðgjöf um endurskoðun á stjórnskipulagi Borgarbyggðar þar sem gert er ráð fyrir aukinni hagræðingu og skilvirkni. Tillaga er gerð um breytingar á störfum með umbótum á ábyrgð og verkaskiptingu starfsmanna. Gert er ráð fyrir að sviðsstjórum verði fækkað úr fjórum í tvo.
Byggðaráð samþykkir tillöguna og felur sveitarstjóra að framfylgja henni.

Samþykkt að vísa afgreiðslu byggðarráðs til sveitarstjórnar.

Magnús lagði fram svohljóðandi bókun:
"Um leið og ég tek undir nauðsyn þess að farið verði í breytingar til þess að styrkja stjórnsýsluna og auka hagræði þá er rétt að benda á þörfina fyrir aukið vægi mannauðsstjórnunar í nýju skipulagi. Markviss mannauðsstjórnun í sveitarfélagi af þeirri stærðargráðu sem Borgarbyggð er gæti haft víðtæk jákvæð áhrif á bæði rekstur og starfsfólk sveitarfélagsins og stofnanir þess.
Það er því mikilvægt að leitað verði allra leiða til þess að styrkja enn frekar stjórnsýsluna með auknu vægi mannauðsstjórnunar í þessu nýja skipulagi."

Eiríkur vék af fundi meðan að þessi liður var ræddur.

Lögð fram svör framkvæmdastjóra Heilbrigðiseftirlits Vesturlands við spurningum um fjárhagsáætlun ársins 2015.
Byggðarráð samþykkti áætlunina fyrir sitt leyti.

Lagðar fram tillögur fræðslustjóra og skólastjóra Grunnskóla Borgarfjarðar til mæta kostnaði við langtímaveikindi.

Rætt um fjárhagsáætlun 2015.

Lagt fram erindi frá nefndasviði Alþingis þar sem sveitarfélaginu er boðið að gefa umsögn um frumvarp til laga um afnám ákvæðis um lágmarksútsvar í lögum um tekjustofna sveitarfélaga.

Lagt fram bréf Golfklúbbsins Glanna um styrk vegna reksturs golfvallarins á Bifröst á næsta ári.
Vísað til fjárhagsáætlunar 2015.

Lagt fram erindi Samtaka sveitarfélaga á Vesturlandi um starfshóp um menningarmál.
Í hópnum eru þrír fulltrúar og einn af þeim sameiginlega frá Borgarbyggð, Skorradalshreppi og Dalabyggð.
Samþykkt að tilnefna Helenu Guttormsdóttur í starfshópinn og Eggert Antonsson til vara.

Lögð fram umsókn S.Ó. húsbygginga ehf um fjölbýlishúsalóðirnar Arnarklett 28 og Birkiklett 2 í Borgarnesi.
Byggðarráð samþykkti að úthluta lóðunum.

Lögð fram fundargerð 148. starfsmannafundar Safnahúss Borgarfjarðar sem haldinn var 18. nóvember s.l.

Lögð fram fundargerð 126. stjórnarfundar Faxaflóahafna sem haldinn var 14. nóvember s.l.

Lagt fram fundarboð á eigendafund Orkuveitu Reykjavíkur sem haldinn verður 28. nóvember n.k.
Einnig var rætt um tillögu að arðgreiðslustefnu Orkuveitu Reykjavíkur.

Rætt um lækkun á skólagjöldum í Tónlistarskóla Borgarfjarðar vegna verkfalls tónlistarkennara.
Samþykkt að lækka skólagjöld haustannar í samræmi við kennslutíma.