Byggðarráð Borgarbyggðar

Eiríkur Ólafsson fjármálastjóri kom á fundinn og fór yfir stöðu fjármála fyrir fyrstu fimm mánuði ársins. Í heildina er staðan nokkuð í samræmi við áætlun þótt nokkrir liðir séu yfir áætlun sem skoða þarf betur.

Guðrún S. Hilmisdóttir sviðsstjóri umhverfis - og skipulagssviðs kom á fundinn og fór yfir fyrirhugaðar framkvæmdir á Kveldúlfsgötu og þau tilboð sem bárust í verkið. Tvö tilboð bárust í framkvæmdina. Hlutur Borgarbyggðar í verkinu er 23,4 millj. Kostnaður er umfram áætlun og verður mætt í viðauka við fjárhagsáætlun.

Samningur við Eyja - og Miklaholtshrepp vegna þjónustu við nemendur úr Borgarbyggð í Laugargerðisskóla lagður fram. Byggðaráð staðfestir samninginn.

Samningur milli UMSB og Borgarbyggðar um leigu á Skallagrímsgötu 7a lagður fram. Byggðaráð staðfestir samninginn.

Hjördís H. Hjartardóttir félagsmálastjóri kom á fundinn og fór yfir, og kynnti, tillögur vinnuhóps um málefni nýbúa í Borgarbyggð. Hópurinn hefur unnið að stefnumótun í málefnum nýbúa og endurskoðun erindisbréfs fyrir nýbúaráð. Byggðarráð þakkar félagsmálastjóra og nýbúaráði vinnuna og framlögð gögn. Samþykkt að fela fjármálasviði ásamt félagsmálastjóra að kostnaðargreina tillögurnar.

Framlögð umsókn Björgunarsveitarinnar Brák um styrk til greiðslu fasteignagjalda í samræmi við reglur Borgarbyggðar. Byggðarráð samþykkir erindið.

Umsókn Unnar Einarsdóttur um stofnun lóðar í landi Stóra-Fjalls lögð fram ásamt gögnum. Byggðarráð samþykkir að lóðin verði stofnuð.

Umsókn um stofnun lóðar í landi Munaðarness. Byggðarráð samþykkir að lóðin verði stofnuð.

Framlögð umsókn Sigurðar Gunnarssonar og Arndísar Guðmundsdóttur um stofnun lóðar í landi Bjarnastaða. Byggðarráð samþykkir að lóðin verði stofnuð.

Sveitarstjóri leggur til að fjölskyldu - og fjármálasviði verði skipt upp í tvö svið og ráðinn verði sviðsstjóri fjölskyldusviðs, undir það svið heyra fræðslumál, félagsþjónusta og íþrótta - og æskulýðsmál. Sveitarstjóra falið að auglýsa eftir nýjum sviðsstjóra. Kostnaðarauka verði mætt í viðauka við fjárhagsáætlun.
Samþykkt að ganga til samninga við StarfsGæði um tímabundna þjónustu á sviði fræðslumála þar til nýr sviðsstjóri hefur verið ráðinn. Kostnaðarauka verði mætt í viðauka við fjárhagsáætlun.
Ráðning forstöðumanns Búsetuþjónustu í Borgarbyggð: Samþykkt að ráða Guðbjörgu Guðmundsdóttir í starfið.
Ráðning skólastjóra Grunnskólans í Borgarnesi, borist hafa fjórar umsóknir um stöðuna. Samþykkt að framlengja umsóknarfrest um stöðuna.