Byggðarráð Borgarbyggðar

Lögð fram drög að ársreikningi 2015. Oddur Gunnar Jónsson frá KPMG sat fundinn undir þessum lið og kynnti drögin. Byggðarráð samþykkti að vísa ársreikningnum til fyrri umræðu í sveitarstjórn þann 14. apríl.

Fundarboð á aðalfund Nemendagarða MB ehf sem haldinn verður 12. apríl n.k. Byggðarráð samþykkti að Björn Bjarki Þorsteinsson verði fulltrúi Borgarbyggðar á fundinum. Ennfremur að Gunnlaugur Júlíusson verði fulltrúi Borgarbyggðar í stjórn Nemendagarða MB.

Fylgiskjal: Fundarboð.

Beiðni verkefnisstjórnar listahátíðarinnar Plan-B um styrk framlagt. Sigursteinn Sigurðsson f.h. verkefnisstjórnar kom á fundinn og kynnti erindið. Byggðarráð fagnar frumkvæðinu og samþykkir að fela sveitarstjóra að kynna erindið fyrir stjórnendum þeirra eigna sem um ræðir. Byggðarráð tekur jákvætt í erindið hvað varðar afnot af húsnæði sveitarfélagsins fyrir listsýningar eftir því sem við verður komið.

Fylgiskjal: Plan-B.

Björn Bjarki Þorsteinsson vék af fundi en Jónína Erna Arnardóttir sat fundinn undir þessum lið. Eiríkur Ólafsson sagði frá þeim viðræðum sem farið hafa fram varðandi kaup á þjónustuíbúð i Ánahlíð. Byggðarráð samþykkti að festa kaup á íbúðinni enda er það í samræmi við stefnu Borgarbyggðar í húsnæðismálum. Umsamið kaupverð er 18,8 millj. og er fjármagnað með eignasölu og vísað til gerðar viðauka við fjárhagsáætlun.

Fylgiskjal: Húsnæðissstefna Borgarbyggðar frá í febrúar.

Framlögð fyrirspurn varðandi lögbýli í Syðri-Hraundal. Samþykkt að vísa erindinu til Umhverfis - skipulags- og landbúnaðarnefndar.

Fylgiskjal: Erindi eigenda Syðri-Hraundals

Bréf Golfklúbbs Borgarness um rekstrarstyrk lagt fram. Byggðarráð samþykkti að bjóða fulltrúa golfklúbbsins að koma á næsta fund byggðarráðs.

Erindi Mennta- og menningarmálaráðuneytisins varðandi úttekt á menntun án aðgreiningar lagt fram. Byggðarráð tekur jákvætt í erindið en það er til umfjöllunar í fræðslunefnd.

Fylgiskjal: Erindi Mennta - og menningarmálaráðuneytis.

Drög að reglum um birtingu gagna með fundargerðum Borgarbyggðar lögð fram. Afgreiðslu vísað til næsta fundar byggðarráðs.

Fylgiskjal: Drög að reglum um birtingu gagna.

Beiðni eigenda Borgarbrautar 9-13 um að Borgarbyggð falli frá forkaupsrétti á eigninni við sölu. Byggðarráð samþykkti að neyta ekki forkaupsréttar við þau eigendaskipti sem fyrirhuguð eru en forkaupsréttur verði áfram áhvílandi á eigninni.

Fundargerð frá 3. fundi samráðshóps um skólahald á Hvanneyri framlögð.

Fylgiskjal: Fundargerð 3. fundar.

Fundargerð vinnuhóps um nýtingu Hjálmakletts ásamt vinnuskjölum lögð fram.

Fylgiskjöl:
Fundargerð 1. fundar
Hjálmaklettur, tæki og tól.

Fundargerð 382. fundar stjórnar Hafnasambands Íslands lögð fram.

Verkefni:
Fundargerð 382. fundar.

Fundargerð 383. fundar stjórnar Hafnasambands Íslands lögð fram.

Fylgiskjal:
Fundargerð 383. fundar.

Hrafnhildur Tryggvadóttir kom á fundinn og kynnti hreinsunarátak sem fyrirhugað er í lok apríl í tengslum við skólana í héraðinu. Byggðarráð fagnar framtakinu og hvetur einstaklinga og fyrirtæki til að taka virkan þátt í átakinu.