Byggðarráð Borgarbyggðar

Endanlegur viðauki við fjárhagsáætlun ársins 2018 og áranna 2019-2021 lagður fram ásamt skriflegum skýringum á hverjar forsendur viðaukans eru. Eiríkur Ólafsson sviðsstjóri fjármála- og stjórnsýslusviðs mætti til fundarins og skýrði framlagðar tillögur. Byggðarráð samþykkti að hækka viðaukann um 2,5 millj. kr. vegna um kaupa á s.k. "ærslabelg". Byggðarráð samþykkti viðaukann og vísaði honum til afgreiðslu í sveitarstjórn Borgarbyggðar.

Framlögð drög að stefnu um upplýsingamál - og íbúasamráð fyrir Borgarbyggð. Byggðarráð þakkaði nefndinni vel unnin störf og gott samráð við íbúa og áhugaverða niðurstöðu af starfi hennar. Byggðarráð leggur til að stefnunni verði vísað til komandi sveitarstjórnar til endanlegrar afgreiðslu.
Vinna er þegar hafin við endurnýjun heimasíðu sveitarfélagsins þar sem upplýsingamiðlun til íbúa verður bætt enn frekar.

Framlögð skýrsla nefndar sem vann íþrótta- og tómstundastefnu fyrir Borgarbyggð. Byggðarráð þakkaði nefndinni fyrir vel unnin störf og gott samráð við íbúa í sinni vinnu. Byggðarráð leggur til að skýrslunni verði vísað til komandi sveitarstjórnar til endanlegrar afgreiðslu.

Framlögð umsókn Mótorsportfélags Borgarfjarðar, dags. 17. apríl 2018, undir land undir starfsemi nefndarinnar. Umsókn félagsins vísað til umfjöllunar hjá USL nefnd.

Framlögð tilkynning Lánasjóðs sveitarfélaga ohf um breytingar á vaxtakjörum sjóðsins sem taka gildi frá 1. Maí sl. Breytilegir vextir verðtryggðra útlána Lánasjóðs sveitarfélaga ohf. verða 2,60% frá og með 1. maí 2018.

Ísland - atvinnuhættir og menning 2012. Framlagt erindi Árna M. Emilssonar varðandi þátttöku Borgarbyggðar í bókaflokknum „Ísland - atvinnuhættir og menning“ sem fyrirhugað er að gefa út árið 2021. Byggðarráð hafnaði erindinu.

Framlögð skýrsla vinnuhóps um fjallskilamál í Borgarbyggð. Byggðarráð þakkaði nefndinni vel unnin störf og vel unna skýrslu. Byggðarráð leggur til að skýrslunni verði vísað til komandi sveitarstjórnar til endanlegrar afgreiðslu.

Eigendastefna Faxaflóahafna lögð fram. Byggðarráð fól sveitarstjóra að yfirfara stefnuna með hliðsjón af umræðum á fundinum.

Samningur við fornbílafélag Borgarfjarðar tekinn aftur til umræðu. Sveitarstjóri kynnti kynnti athugasemdir fulltrúa fornbílafélagsins við áður framlögð drög að samningi. Byggðarráð fól sveitarstjóra að ganga frá samningi við félagið miðað við þær forsendur að möguleikar sveitarfélagsins á að segja samningnum einhliða upp vegna meiri háttar breytinga taki ekki gildi fyrr en eftir tímamörk núgildandi samnings milli sveitarfélagsins og fornbílafélagsins vegna gúanós og fjárréttar sem nær fram til 31. mars 2025.

Lögð fram umsókn Golfklúbbs Borgarness um fjárstuðning að upphæð 2,2 millj. kr. á ári í fimm ár til framkvæmda á Hamarsgolfvelli. Byggðarráð fagnar metnaðarfullri sýn á framtíðaruppbyggingu á svæðinu. Byggðarráð telur ekki fært að binda hendur komandi sveitarstjórnar til svo langs tíma undir lok kjörtímabilsins. Byggðarráð samþykkir að fela sveitarstjóra að vinna áfram að samstarfi við GB um umhirðu grænna svæða. Sveitarfélagið áformar að leggja stíg frá Borgarnesi að Hamri á næstu misserum í samstarfi við Vegagerðina og eru 5 millj. kr. á áætlun þessa árs til þeirrar framkvæmdar.

Guðveig lagði fram svohljóðandi bókun "Undirrituð telur að óskir Golfklúbbs Borgarnes um styrk til næstu 5 ára til uppbyggingar á vellinum og aðstöðu séu hóflegar, og eðlilegt sé að sveitarfélagið taki að einhverju marki þátt í þeim kostnaði sem fyrir liggur á þessu glæsilega skilgreinda íþróttamannvirki sveitarfélagsins."

Kynntar reglur um fjárframlög Borgarbyggðar til framkominna framboða til sveitarstjórnarkosninga í maí 2018. Í fjárhagsáætlun fyrir árið 2018 er heimild til að verja samtals 1.0 m.kr. til stuðnings framboðum til sveitarstjórnar í Borgarbyggð. Fjárhæðinni verður skipt jafnt milli framkominna framboða þegar framboðsfrestur er útrunninn.