Byggðarráð Borgarbyggðar

Framlagt bréf Bifreiðaþjónustu Harðar og Grana ehf. dags. 11. Maí 2018. varðandi lóðarréttindi að Borgarbraut 55. Til fundarins mættu Þórir Haraldsson, forstjóri Líflands og Sigurður Einarsson í Hellubæ, stjórnarformaður Bifreiðaþjónustu Harðar. Einnig mætti Ragnar Frank Kristjánsson, sviðsstjóri umhverfis- og skipulagssviðs til fundarins. Sveitarstjóra og sviðsstjóra umhverfis - og skipulagssviðs falið að vinna að samkomulagi við lóðarhafa Borgarbrautar 55.

Framlögð tillaga Lögreglustjórans á Vesturlandi að sameiginlegri lögreglusamþykkt fyrir Vesturland ásamt fylgigögnum. Byggðarráð lýsir vilja til áframhaldandi vinnu að sameiginlegri lögreglusamþykkt.

FL situr hjá við afgreiðslu málsins.

Innheimta veggjalda við Hraunfossa. Sveitarstjóri reifaði málið og skýrði út aðstæður. Byggðarráð bókaði eftirfarandi: "Hraunfossar hafa verið friðlýst svæði frá árinu 1987. Umhverfisstofnun ber ábyrgð á Hraunfossum og nánasta umhverfi þeirra samkvæmt sérstakri auglýsingu nr. 410/1987. Umhverfisstofnun hefur einnig komið að fjármögnun á uppbyggingu göngustíga og útsýnispalla í þeim tilgangi að ferðafólk geti notið fegurðar Hraunfossa án þess að spilla nærliggjandi umhverfi. Einnig ber Umhverfisstofnun ábyrgð á landvörslu á svæðinu. Vegagerðin hefur lagt veg að svæðinu fyrir opinbert fé svo og byggt upp bílastæði. Borgarbyggð hefur einnig lagt fjármagn í uppbyggingu á aðstöðu á svæðinu til að auðvelda aðkomu ferðafólks að því og tryggja vernd náttúrunnar á hinu friðlýsta svæði. Einnig hefur Borgarbyggð kostað hreinlætisaðstöðu við Hraunfossa um langt árabil. Því vekur það furðu að leigutakar jarðarinnar Hraunás skuli á nýjan leik hefja töku vegtolla fyrir eigin ábata inn á fyrrgreint svæði án þess að hafa á nokkurn hátt lagt fé til uppbyggingar á þeirri aðstöðu sem er þar til staðar. Byggðarráð Borgarbyggðar telur slíkt ófært og skorar á lögreglustjórann á Vesturlandi og Umhverfisstofnun að tryggja að innheimtu vegtolla við Hraunfossa verði tafarlaust hætt."

Sveitarstjóri ræddi stöðu Rauðsgilsréttar og viðhorf eigenda jarðarinnar Rauðsgils gagnvart henni. Byggðarráð óskar eftir minnisblaði um stöðu réttarinnar.

Kynning á fyrirhuguðum viðhaldsframkvæmdum. Ragnar Frank Kristjánsson, sviðsstjóri umhverfis- og skipulagssviðs, mætti til fundarins og kynnti fyrirhugaðar viðhaldsframkvæmdir. Byggðarráð samþykkir að s.k. ærslabelgur verði settur niður við Arnarklett.

Kjörskrá vegna sveitarstjórnarkosninga 26. maí 2018 lögð fram. Byggðarráð samþykkti kjörskrána án athugasemda, skv. umboði frá fundi sveitarstjórnar Borgarbyggðar þann 14. maí sl.

Framlagður samningur milli Borgarbyggðar og Kaupfélags Borgfirðinga um kaup Borgarbyggðar á bröggum og landi við Egilsholt. Byggðarráð samþykkti samninginn.

Framlagt kauptilboð í Kleppjárnsreykjabraut 5 á Kleppjárnsreykjum frá Þóru Magnúsdóttir. Byggðarráð samþykkti kauptilboðið.

Framlagður póstur frá Jóhannesi Helgasyni Hamri í Þverárhlíð vegna greiðslu fjallskilagjalda þar sem óskað er eftir endurgreiðslu fjallskilagjalds. Sveitarstjóra falið að afla frekari upplýsinga.

Framlagt til kynningar yfirlit um jafnréttisfréttir frá evrópskum sveitarfélögum sem dreift er af Sambandi íslenskra sveitarfélaga.