Byggðarráð Borgarbyggðar

Byggðarráð felur sveitarstjóra að finna tímabundið húsnæði fyrir hluta eða alla starfsemi ráðhússins þar sem ástand hússins vegna rakavandamála er verra en búist var við, við forskoðun Eflu á hluta fasteignarinnar. Byggðarráð leggur jafnframt til að ljúka við úttekt á ráðhúsi Borgarbyggðar og að farið verði í viðeigandi aðgerðir í kjölfarið. Málið verður lagt aftur fyrir næsta fund byggðarráðs.

Guðveig Eyglóardóttir leggur fram eftirfarandi bókun: Ljóst er af lýsingum að dæma að húsnæði Ráðhúss Borgarbyggðar er illa farið af raka, myglu og skemmdum af þeim sökum. Undirrituð telur óforsvaranlegt að sveitarfélagið leggi í kostnað við viðgerðir á húsinu og leggur til að unnið verði að því að húsið verði rifið eða selt í því ástandi sem húsið er. Brýnt er að koma starfsemi Ráðhússins í nýtt og hentugra húsnæði til framtíðar.

Lagt er fram minnisblað Eiríks Ólafssonar, sviðsstjóra fjármálasviðs, dags. 19. janúar 2021, um stöðu fjárfestingar og framkvæmda ljósleiðara. Byggðarráð samþykkir tillögu sviðsstjóra um að fylgst verði með hvernig verkinu vindur fram á árinu 2021 og ef kostnaður sveitarfélagsins stefnir í að verða meiri en áætlun þessa árs gerir ráð fyrir verði gerður viðauki við fjárhagsáætlun. Byggðarráð felur sveitarstjóra að fylgjast vel með framkvæmdum við lagningu ljósleiðara.

Sveitarstjóri lagði fram minnisblað um ástæður þess að skýrsla KPMG til stjórnenda sveitarfélagsins um innra eftirlit og fjárhagskerfi ársins 2020 beri að fara með sem vinnuskjal og því trúnaðarmál.

Guðveig Eyglóardóttir leggur fram eftirfarandi bókun: Undirrituð telur það óásættanlegt að ekki sé hægt að greina frá helstu veikleikum og ábendingum sem sveitarfélaginu hafi borist og tillögur að úrbótum. Eðlilegast væri að Byggðarráð myndi greina íbúum í meginatriðum hverjar athugasemdirnar eru.

Meirihluti byggðarráðs ítrekar að hér er um vinnuskjal að ræða. Aflað var upplýsinga hjá KPMG hversvegna umrætt gagn inniheldur trúnaðarupplýsingar og fengust þau svör að skjal af þessum toga geti innihaldið upplýsingar um einstaka starfsmenn og annað sem fellur undir persónuvernd. Alvarlegustu athugasemdunum verða gerð skil í skýrslu enduskoðenda sem lögð verður fram opinberlega með endurskoðuðum ársreikningi.

Byggðarráð samþykkir tillögu Orkuveitu Reykjavíkur um að lagt verði til við forsætisráðherra að dótturfélögum Orku náttúrunnar ohf., ON Power ohf., Gagnaveitu Reykjavíkur ehf. og Carbfix ohf. verði veitt undanþága frá upplýsingalögum nr. 140/2012.

Byggðarráð felur sveitarstjóra að tilkynna nálægum íbúum um að sveitarfélagið skuli gefa umsögn um rekstur gistiheimilis að Kveldúlfsgötu 27, Borgarnesi og veita þeim frest til þess að skila inn athugasemdum vegna þessa. Jafnframt skal sveitarstjóri óska eftir því við byggingarfulltrúa að hann taki út húsnæðið að Kveldúlfsgötu 27 í samræmi við kröfur reglugerðar um veitingastaði, gististaði og skemmtanahald nr. 1277/2016.

Byggðarráð samþykkir tillögu sviðsstjóra stjórnsýslu- og þjónustusviðs að ráða sérfræðing til þriggja mánaða til að innleiða breytingar á upplýsingatæknistefnu Borgarbyggðar og endurskipuleggja þjónustu vegna upplýsingatækni sveitarfélagsins.

Með ákvörðun byggðarráðs 27. ágúst 2020, sem staðfest var af sveitarstjórn 10. september 2020, var sveitarstjóra falið að vinna að afsali fjallhúsa á Arnarvatnsheiði til sjálfseignarstofnunar Arnarvatnsheiðar og Geitlands. Stefnt er að því að ljúka afsali í febrúarmánuði 2020, en sveitarstjóri mun kanna hvort þörf er á að fá fasteignasala að verkinu eða ljúka málinu með aðkomu starfsmanna ráðhússins. Haft verður samband strax í kjölfar fundarins við forsvarsmenn sjálfseignarstofnunarinnar til þess að ganga frá skjalavinnu í samvinnu við sjálfseignarstofnunina.

Byggðarráð tekur jákvætt í framlagt kauptilboð og felur sveitarstjóra að undirrita kauptilboð og kaupsamning, með fyrirvara um samþykki sveitarstjórnar. Jafnframt er sveitarstjóra falið að gera viðauka við fjárfestingaráætlun vegna fjárfestingarinnar að fjárhæð kr. 1.400.000,- og leggja fyrir sveitarstjórn. Hækkun kaupverðs skýrist af verðlagsþróun frá því viljayfirlýsing var undirrituð.

Byggðarráð samþykkir tillöguna og veitir SSV heimild til að undirrita samning SSV við atvinnu- og nýsköpunarráðuneytið um rekstur áfangastaðastofu, á grunni markaðsstofu.

Ársskýrsla Slökkviliðs Borgarbyggðar fyrir árið 2020 er lögð fram til kynningar.

Lögð fram til kynningar.

Lagt fram til kynningar.

Lagt fram til kynningar.