Byggðarráð Borgarbyggðar

Til fundarins mæta Sonja Lind Eyglóarsdóttir, formaður stjórnar, Sigurður Guðmundsson, framkvæmdastjóri í leyfi og Sigríður Halldóra Sigurgeirsdóttir, starfandi framkvæmdastjóri. Á 592. fundi byggðarráðs var sveitarstjóra falið að boða fulltrúa UMSB á fund byggðarráðs til að ræða nánari útfærslu þeirrar þjónustu sem um ræðir. Á 207. fundi fræðslunefndar, var eftirfarandi bókað:

„Fræðslunefnd samþykktir tillögu sviðsstjóra sem snýr að því að samningnum verði sagt upp og Borgarbyggð taki starf tómstundafulltrúa aftur yfir til sín. Þau verkefni sem tómstundafulltrúi hefur verið með hjá UMSB eru vinnuskólinn, sumarfjör, frístund og félagsmiðstöð. Gert er ráð fyrir því að Borgarbyggð bjóði núverandi tómstundafulltrúa hjá UMSB tímabundna ráðningu er það hugsað til þess að sú faglega starfsemi sem byggst hefur upp færist farsælega yfir til Borgarbyggðar. Það er mikilvægt fyrir Borgarbyggð að fá aftur til sín starf tómstundafulltrúa og sú fagþekking sé til staðar hjá sveitafélaginu. Það er sérstaklega mikilvægt í ljósi nýrra laga um samþætta þjónustu en einnig til að tryggja rödd tómstunda innan stjórnsýslu Borgarbyggðar.

Fræðslunefnd þakkar UMSB fyrir samstarfið og vill styrkja áframhaldandi gott samstarf á milli aðila með því að UMSB komi með tillögur að því hvernig samstarfinu verði háttað þegar starfið færist yfir. Þá er einnig lagt til að á næsta ári verði aðrir samningar milli UMSB og Borgarbyggðar endurskoðaðir með tiliti til að auka samstarfið í ákveðnum málum.

Fræðslunefnd samþykkir tillögu sviðsstjóra og vísar málinu til Byggðarráðs."

Byggðarráð tekur undir það að mikilvægt sé að starf tómstundarfulltrúa færist yfir til Borgarbyggðar og að sá hluti samningsins verði endurskoðaður. Engu að síður þurfi að rýna aðra hluta samningsins með tilliti til þess hvaða verkefni UMSB sinni áfram og hvaða frekari verkefni væri hægt að fela UMSB til þess að tryggja áframhaldandi gott samstarf milli sveitarfélagsins og UMSB. Einnig verði skoðað hvort mögulegt sé að starf tómstundafulltrúa verði að hluta starf Borgarbyggðar en að hluta hjá UMSB.

Sveitarstjóra er falið að funda með fulltrúum UMSB, ásamt fulltrúum fjölskyldusviðs um þær breytingar. Í kjölfar þeirrar vinnu er þess óskað að fræðslunefnd fjalli um málið að nýju.

Á árinu 2021 voru gerðir fimm viðaukar við fjárhagsáætlun þar sem brugðist var við þeim verkefnum sem koma upp eftir að upphafleg áætlun var samþykkt. Þar er bæði um að ræða breytingar á rekstri og fjárfestingum og var því mætt með lántöku og breytingu á eigin fé en tekjur sveitarfélagsins voru nokkuð hærri en áætluð voru. Miklar breytingar þurfti að gera í húsnæðismálum á árinu vegna rakaskemmda og óheilsusamlegs umhverfis auk þess sem launagjöld voru vanáætluð í launaáætlun. Útgjöld sveitarfélagsins voru því mun hærri en upphaflega var áætlað og var áætluð rekstrarniðurstaða við samþykki síðasta viðaukans áætluð neikvæð um 22 millj. kr.

Skatttekjur eru um 130 millj. kr. meiri en áætlun gerði ráð fyrir, þar af eru um 87 millj. kr. framlög frá Jöfnunarsjóði sveitarfélaga og 61 millj. kr. vegna hærri útsvarstekna. Þegar tekið er tillit til viðauka var launakostnaður sveitarfélagsins og rekstrarkostnaður innan áætlana. Heildar launakostnaður var 2.830 millj. kr. og annar rekstrarkostnaður 1.590 millj. kr.

Fjárfestingar ársins voru 502 millj. kr. en áætlun með viðaukum gerði ráð fyrir að þær yrðu 612 millj. kr. Upphafleg áætlun gerði ráð fyrir 339 millj. kr. í fjárfestingar. Ljósleiðaraverkefnið mun klárast á árinu 2022 en gert var ráð fyrir 68 millj. kr. kostnaði á árinu 2021, sem endaði í 9 millj. kr. að teknu tilliti til styrkja, kostnaður við leik- og grunnskólahúsnæði var samtals 67 millj. kr. minna en áætlað var í fjárfestingaráætlun með viðauka.

Rekstrarniðurstaða ársins fyrir samstæðu A og B hluta er neikvæð um 89,8 millj. kr. sem er 67,7 millj. kr. verri afkoma en ráð var fyrir gert í fjárhagsáætlun með viðaukum. Verri afkoma miðað við fjárhagsáætlun skýrist fyrst og fremst af því að hækkun lífeyrisskuldbindinga er meiri en reiknað var með vegna þess að reglur um útreikninga breyttust í lok árs og hafa þessi áhrif á reksturinn. Í áætlun var gert ráð fyrir lífeyrisskuldbindingar yrði 80 millj. kr. en hækkuðu um 194 millj. kr. og voru samtals 274 millj. kr.

Veltufé frá rekstri er 528 millj. kr. eða 10,8 % af tekjum. Eigið fé í árslok er 4.523 millj. kr. og eiginfjárhlutfallið er 45,3%. Skuldaviðmið er 59%.

Byggðarráð telur ánægjulegt hver niðurstaða ársreikningsins er þrátt fyrir ófyrirséða aukningu lífeyrisskuldbindinga sveitarfélagsins sem komu til rétt fyrir áramót 2021-2022 vegna reglugerðarbreytingar sem gerð var í desembermánuði. Reglugerðarbreytingin felur í sér breyttar reiknireglur sem tengjast hækkandi lífaldri þjóðarinnar og fleiri þáttum.

Byggðarráð vísar ársreikningnum til fyrri umræðu í sveitarstjórn sem fer fram þann 7. apríl n.k.

Byggðarráð leggur til við sveitarstjórn að samþykkja hlut sveitarfélagsins í viðhaldi á vatnsveitu Hraunahrepps og felur sveitarstjóra að bæta kostnaði upp að 1.030 þús. kr. við viðauka II við fjárhagsáætlun 2022.

Lagt er fram minnisblað vegna tillögu að viðauka II við fjárhagsáætlun ársins 2022. Í tillögunni er gert ráð fyrir 500 þús. kr. stofnframlagi í Nýsköpunar- og þróunarsetur á Vesturlandi, 1 millj. kr. framlagi til viðhaldsframkvæmda vegna Vatnsveitna Hraunhrepps og 89,6 millj. kr. kostnað við móttöku flóttafólks auk 89,6 millj. kr. framlags ríkisins vegna móttöku flóttafólks. Breyting á sjóðstreymisáætlun verður sú að handbært fé lækkar um 1.530 þús. kr.

Ný kosningalög nr. 112/2021 hafa verið sett og eru sveitarstjórnarkosningarnar 2022 fyrstu kosningarnar sem farið er eftir lögunum. Í 18. gr. kosningalaga er kveðið á um hæfi kjörstjórnarmanna, en þar segir að kjörstjórnarmaður skuli víkja úr kjörstjórn ef einstaklingur er í kjöri sem er eða hefur verið maki hans, sambúðarmaki, fyrrverandi sambúðarmaki eða skyldur eða mægður honum í beinan legg eða að öðrum lið til hliðar eða tengdur honum með sama hætti vegna ættleiðingar. Vegna framangreindrar hæfisreglu, vegna flutninga úr sveitarfélaginu og beiðni um úrlausn úr undirkjörstjórn skal sveitarstjórn kjósa 13 aðila inn í kjörstjórn, ýmist vara- eða aðalfulltrúa. Sveitarstjóra er falið að auglýsa eftir kjörstjórnarmönnum sem ekki eru vanhæfir vegna reglunnar.

Byggðarráð þakkar upplýsingagjöfina. Gert er ráð fyrir taka á móti gestum á Bifröst frá og með næstu viku. Byggðarráð þakkar viðbrögð íbúa sveitarfélagsins við beiðnum um sjálfboðaliðastörf og þátttöku þeirra í að undirbúa íverustaði þeirra á Bifröst með framlögum í formi mismunandi búnaðar.

Byggðarráð samþykkir framlagðar innkaupareglur fyrir Borgarbyggð og vísar þeim til staðfestingar sveitarstjórnar.

Byggðarráð felur sveitarstjóra að ganga til viðræðna við verktaka sem sinna snjómokstri innanbæjar í Borgarnesi til breytinga á samningi, en að öðrum kosti yrði samningi sagt upp í samræmi við uppsagnarákvæði verksamnings.

Lagt fram til kynningar.

Byggðarráð felur sveitarstjóra að óska eftir kynningu vegna málsins á næsta fund byggðarráðs.

Byggðarráð samþykkir framlögð drög og felur sveitarstjóra að rita undir samninginn með fyrirvara um samþykkt sveitarstjórnar.

Kristján Finnur Kristjánsson er tilnefndur sem aðalmaður í stjórn Handverkssjóðs félags iðnaðarmanna í Borgarnesi og Ingibjörg Hargrave sem varamaður.

Byggðarráð tilnefndir Einar Ole Pedersen sem fulltrúa Borgarbyggðar á fundinum.

Lagt fram til kynningar

Lagt fram til kynningar.

Sveitarstjóra er falið að koma á fundum við fyrirsvarsmenn Slatta varðandi framhald samnings um uppbygginguna.